Okaana kokamati keedula nanho oka xulifa konima eshi ka dengwa kuxe nodibo.

Oshiningwanima osha ningilwa meumbo lavo, momafiku 15 omwedi ou komukunda Oshalande koshikandjohoololo shaKongo, moshitukulwa shaHangwena efimbo lokomatango. Omufekelwa ou eli xe yokaana omukwashiwana waAngola weedula 35, okwa kwatwa po nota pangulilwa oshibofa shedipao.  Omupopiliko wopolifi koshitukulwa shaHangwena Warrant Andreas Nghiyolwa okwa hokololwa ta ti okaana okwa li ke li meumbo naxe nokudja opo okwa tameka okudenga okaana nodibo.

Okaana oka monifwa oshiponga komutwe noshoyo kombuda ashike efiku olo xe ina twala omona koshipangelo.

Opolifi oya hokolola tai ti mongula eshi kwa sha omufekelwa okwa kufa okaana ndele te ka twala koshipangelo konima eshi a didilika kutya oka mona oshiponga neenghono, ko ka kwa li ta dulu okulya.

Okaana oka xulifila pefimbo ve li mondjila yoku ya koshipangelo shaKongo.

Opolifi oya ti okudja opo xe okwa ka lopotela opolifi ndele ta popi oipupulu kutya okaana oka tuwa kongobe.

Okaana oka ningilwa omapekapeko kopolifi noidjemo otai ulike kutya okaana oka dengwa molwashi okwa li ke na oipute komutwe, moshipala nokombuda.          

Opolifi oya tamake okuningila omufekelwa omapulapulo ndele tai mono kutya mboli okaana okadengwa.

Omufekelwa ou okwa li hava di meumbo auke nokaana kaye.

Ina ya nakuninga oshihakanwa Omunamibia nokwa shivifilwa kombinga yefyo lomona waye.

Opolifi oya ti fiyo opapa ka pena ouyelele kutya omolwashike omufekelwa a dengela omona. –fhamalwa@nepc.com.na