Auleria Wakudumo
Okaana keemwedi 15 oka xulifa sha dja eshi ka wila mevela lomeva. Oshiningwanima osha ningilwa komukunda Onaniki moshitukulwa shaMusati sha ningwa Etitatu lwopo 15h00. Oshiningwanima eshi osha kolekwa kukomufala wopolifi moshitukulwa shaMusati Ismael Basson.
Nakufya okwa tongononwa oye Peacemaker Uugwanga. Basson okwa holola ta ti vati Uugwanga okwa wila mevela lomeva la li melimba omanga ovakulunhu vali mokatala pefimbo loshiningwanima.
Oshiningwanima shi kwao, opolifi moshitopolwa shaHangwena tai kongo omushingi ehe shiivike a faduka po konima yoshiponga sha ningilwa mopate yakula yaEenhana pokati komukunda Ondaanda nOnhuno.
Oshiponga eshi osha ningwa Etitatu lwopo 20h00 nosha kolekwa kukomufala wopolifi moshitukulwa shaMusati Commissioner Ottilie Kashupulwa. Kashupulwa okwa ti vati omushingi oo kwali ta shingi otuwa yoToyota Wish yonomola N 1061 HN okwa shinga melambo lopate osho sha eta omalola otuwa a tope nomushingi okwa nyengwa okuukililifa otuwa. Konima otuwa oyeke li denga motuwa ikwao osho sha eta ovatwaalelwa aveshe motuwa yoToyota Wish oshoyo omushingi wohauto ikwao va mone oshiponga.
Ovanhu vahetatu okudja moToyota Wish ova twala koshipangelo shepangelo shaEenhana navamwe ova tumwa vaka mone epango la wedwa po koshipangelo shepangelo shaShakati.