Ethimbo lyokulonga momapya olyafumako onkene aanafalama yomomapya oya ningi omaindilo gomambakumbaku ge pangelo ku yele.
Aanafalama yomiitopolwa ya yooloka oya ningi omaindilo gomambakumbaku ga indjipalekwe omanga omvula inayi loka unene.
Maria Newaka gwomomukunda Onaanda okwa ti, omambakumbaku gepangelo ohaga kala uupyakandhi aluhe, oshoka ohaga kala taga kondjelwa oshoka kehe gumwe okwa hala okuli longitha omolwa ondando yago yili pevi. “Ohashi kala oshindhigu okutegelela embakumbaku limwe, lyi maneko omagumbo agehe taga pululilwa moshikandjohogololo shimwe,” ta popi ngaaka. Newaka ta ti, oshikandjohogololo oshina omikunda ondhindji, na kehe gumwe okwa hala okupulilwa.
“Shoka ohashi ke tu thiminika tuka konge omambakumbaku gopaumwene ngoka gena ondilo, gamwe taga pula N$500/600 mo wili,” ta fatulula ngaaka.
Pehovelo Nainda gwomomukunda Odobe okwati, okwi ishangitha okupululilwa kembakumbaku lyepangelo ohaku ya tokitha okulonga omapya gawo ku yele, oshoka omusholondondo gwomadhina ohagu kala omule. “Epangelo ohali tu pula ombiliha, N$250 mo wili yimwe, moka hatu vulu oku mona ompito yokupulilitha nando oowili mbali nenge ndatu,” Nainda ta hokolola. Ta gwedha po ta ti, ihe ndyoka lyo paumwene ohali pulula ashike owili yimwe oshoka oshimaliwa oshindji, itaya gwanitha oowili mbali nenge ndatu.
Omupopiliko nomugandji gomauyelele mendiki lyuuministeli wuunamapya Jona Musheko okwati, nonando omambakumbaku gepangelo ita gaka indjipalekwa, otaya ka kwathela aanafalama okufuta ko N$350 mo wili, uuna ya mono embakumbaku lyopaumwene.
“Kehe embakumbaku lyopaumwene olyina ondando yoshimaliwa sha lyo, onkene uuministeli wuunamapya otau kafuta oshimaliwa shoka, omanga iihupe tayi ka futwa kaanafalama yo yene,” ta fatulula ngaaka. Musheko okwa ti, omambakumbaku ngoka oga ishangitha koombelewa ndhookansela, opo ga vule okukwathela oshigwana shoka itaashi vulu okufuta oshimaliwa ashihe hashi pulwa mo wili nenege itashi ka ona ompito yembakumbaku lyepangelo.
“Shika natango okwali twe shi etapo okuyambindhindha woo, ooyene yomambakumbaku,” ta popi ngaaka.
Kansela gwoshikandjohololo shUuvudhya Timoteus Shivute okwa ti, onkalo yokumona ompito yokupululitha nembakumbaku lyepangelo moshikandjohogololo she oya kala ondhigu, oshoka aantu oyendji ihe omambakumbaku oga kala ashike geli gaali.
“Nonando shoka sha kala ngaaka, ota tengeneke onkalo tayi kala hwepo omolwa omukalo ngoka gwa tulwa po gomambakumbaku gopaumwene ta gaka ka kwathela aanafalama,” ta popi ngaaka.
Ta ti, oyendji oya ishangitha, okupululila oshigwana, yo taya futwa etata kuuministeli omanga etata tali futwa kaanafalama.
Ta ti, natango aantu yokulima oshowo mboka yena oondongi handhi pulula, otaya kumagidhwa ya ishangithe opo ya vule okulongithwa, yaka kwathele omagumbo ngoka taga ka kala geli mo mpumbwe.