ETUNDA – Ovanhu omayovi mwa kwatelwa ounona novakulupe okwa li va holoka momwaalu muhapu okuyandja efimaneko lavo laxuuninwa kokapale keedila Andimba Toivo ya Toivo nosho yo keumbo kEtunda onghela.

Ovaleli vopapolitika va yooloka, ovaleli vopamifyuululwakalo ova hokolola tava ti Nujoma okwa li omulumenhu ehe na okatongo.

Onghela eepate okwa li di hadi eetuwa okudja kOndangwa fiyo okEtunda.

Olutu laye ola shingwa okudja kOndangwa fiyo okEtunda keumbo lavo.

Pefimbo oshiwana sha ka shakeneka omudimba kOndangwa okwa li tashi kwena Omukokolipresidente wavo.

Omupresidente omutivali Hifikepunye Pohamba okwa tanga Nujoma ongomuleli kwa li e na elandulafano nelongelokumwe.

“Onda kanifa kaume kange muwa twa dja naye ondjila ile pefimbo loita,” ta ti.

Pohamba okwa li a nyika oluhodi konima a tala Nujoma koshipala pefimbo olutu laye la fika keumbo koWindhoek.

Okwa xukula omahodi molwekanepo lakaume kaye.

Uutoni Nujoma, omona wOmukokopresidiente okwa  ti xe okwa li e na olukeno noshiwana molwaashi okwa etela Ovanamibia aveshe emanguluko.

“Tate okwe tu tekula tu fimaneka ovakulunhu. Okwa kala alushe he tu kumaida tu lihonge nondjungu,” ta ti. Okwa ti xe okwa wanifa po oshilonga shaye okudja pefimbo loita fiyo ta mane ko oshikako shaye shoupresidente.

“Tulukwa nombili tate wetu. Otwa pandula kewiliko loye,” ta ti.

Olutu laNujoma ota li twalwa koitukulwa iheyali opo shiwana shi yandje efimaneko laxuninwa.

-fhamalwa@nepc.com.na