ONGWEDIVA – Omunambelewawiliki koshikondo shetengeneko longhaloyomhepo Odillo Kgobetsi okwa kumaida oshiwana opo shi kale sha ngungumana shi li meenduda ngeenge ku na odula i na omaluvadi shaashi eshi osha nyika oshiponga. 

“Omunhu ngeenge okwa hangika ta lifa na ninge onghendabala yokukala e li kokule noimuna. Okashelu kake hole omunhu e li popepi noimuna,” ta ti. 

Okwa weda po ta ti oshiwana inashi pumbwa okukala shi li mumwe noinamwenyo ngaashi eembwa, oumbishi ile oikombo ngeenge ku na odula tai shela shaashi otashi eta okashelu ka kwate ovanhu noupu. 

Okwa ti oshiwana nashi xulife po kukala tashi longo momapya ile okukala tashi tu oilya koshini pefimbo lodula tai shela shaashi eshi ohashi dulu okueta oshiponga ile efyo. Kgobetsi okwa popya e likwatelela koshiningwanima sha ningwa mexuliloshivike omo omulumenhu weedula 33 neengobe daye nhatu va dipawa kokashelu koKavango West. 

Nakufya okwa tongololwa oye Moyo Yashime omukalimo womukunda Kamuti. 

Okwa popya ta ti okwa teelelwa odula i na omingungumo tai ka loka unene kombinga yaKavango noshoyo koshitulwa shaZambezi. 

Kgobetsi okwa ti ovakulunhu nava kale tava yandje ouyelele kounona opo va xulife po okukala tava danauka ile tava ningi eweelelo ngeenge ku na odula tai shela. 

“Ovanhu inava tauluka eendobe ile omilamba domeva molwaashi omunhu ota dulu okuwila mo,” ta ti. 

-ftamalwa@nepc.com.na