Uunona wu li 286 wokosikola Shingunguma Combined yi li moshitukulwa shaHangwena owu li komagumbo oshoka osikola yawo oya pata omolwomeya. 

Shika osha holoka sho omvula ya ningi esiku tayi loko nawa moshilongo, nokuteta ko oondjila dhimwe ndhoka dha ya koosikola. 

Omulongi s ikola gumwe posikola ndjoka okwa ti okwa longo oomvula dha piti po10 moshitopolwa shaHangwena ihe ota koleke kutya epato lyosikola yawo ndjoka hali ningwa omvula nomvula, ohali etwa oshoka kapu na oondjila dhoshinanena dha ya kosikola hoka. 

“Ngeno okwa li pe na mpoka tapu pitwa ngeno oosikola itadhi pata. Epato lyomumvo kehe otali shunitha monima eilongo lyaanona oshoka omasiku gamwe itaya longwa, otaya tegelele omeya ga pwine,” ta nyenyeta ngaaka. 

Ta ti, mboka uupyakadhi womumvo kehe, onkene ethimbo opaife okukandulwa po 

Omunambelewa omukuluntu gwelongo koshikondo shokuninga omathaneko moshitopolwa shaHangwena Omri-onn Kavandje okwa ti, uupyakadhi wa taalela oosikola ndhoka hadhi pata ethimbo lyomeya, oondjila. 

“Oondjila okuya koosikola hoka odho uupyakadhi oshoka aalongi naalongwa kaye na mpoka taya piti. Ohashi kala sha nika oshiponga okutaaguluka omeya ngoka omale, aanona yamwe aashona unene sho shoka hashi etitha oosikola dhi pate pakathimbo,” ta fatulula ngaaka. 

Ta yelitha kutya omeya hago ge li moosikola, ihe oondjila okuya koosikola odho kadhi po. 

Kavandje okwa ti, uupyakadhi mboka otau kandulwa po ashike uuna pwa tulwa oondjila noontopa ndhoka tadhi kwatakanitha oosikola. 

“Osikola ngaashi Uundjombala osekundosikola, ihe aalongwa yamwe haya zi komikunda ku na omeya oya tetwa ko, notaku kambadhalwa ya tulwe mootenda opo ya vule okuza posikola manga omeya taga shonopala,” ta gwedha ko ngaaka. 

Otatu indile epangelo lyi gandje oshimaliwa okutunga oondjila okuya koosikola opo ku yandwe epato lyoosikola monakuyiwa. 

Oosikola konooli odha taalela uupyakadhi womumvo kehe, sho hadhi pata omolwomeya gomvula ngoka haga kala ga dhingoloka oosikola ga teta ko aalongwa naalongi okuthika poosikola. 

Uupyakadhi mboka ohau lopotwa omumvo kehe miitopolwa unene Ohangwena, Omusati osho wo Oshana, shoka hashi etitha aalongwa ya kale momagumbo omolwomeya taga ziilile koAngola ethimbo lyomvula. 

Oosikola dha thika po20 odha li dha pata moshitolwa shaMusati iiwike ya ziko omolwomeya gomvula ogendji ga tete ko oondjila. 

Ngoloneya gwoshitopowa shaMusati Erginus Endjala okwa ti, omeya oga shuna pevi naalongwa oyendji oya shuna koosikola, ihe ina lopotelwa we osikola ya pata ethimbo ndika. 

“Ondu uvite ko uupyakadhi woondjila, noosikola hadhi pata ethimbo yomvula, ihe otandi ku galukile naashoka epangelo lya ipyakidhila nasho okukandula po uupyakadhi mboka hau holoka omumvo kehe,” Ngoloneya ta ya mukula ngaaka. 

Okakomitiye kathikamena po omutumba gwopashigwana oka kala nokuthiminika uuministeli woondjila okulonga oondjila tadhi kwakanitha aakalimo koosikola, niipangelo unene kuushayi. 

Omukuluntu gwelongo Sanet Steenkamp sho a pulwa kutya epangelo olya dhiladhila po shike okukandula po uupyakadhi mboka, okwa yamukula oshifokundaneki shika kutya ote shi galukile neyamukolo. 

-vkaapanda@nepc.com.na