Omukulunhuwikili wehongo neenghulunghedi Sanet Steenkamp okwa ti eefikola otadi shi endifa nawa okuninga oikunino opo ovanafikola va dule okulonga oikulya yavo vene.
Okwa pandula noku udite etumba okumona ovanafikola ve na ohokwe yokulonga moikunino yavo.
“Otu na eefikola dihapu da etelwa oyuuyemo yoshimaliwa tashi di mokulandifa oilikolwa tai di mokunino,” ta ti.
Okwa yelifa ta ti moikunino ohamu likolwa oikunomwa ya yooloka ngaashi omatama, okanakamundesha, oikapa, oihakautu nosho tuu.
Steenkamp okwa ti osha fimana ngeenge eefikola tadi twikile okulonga nelitulemo moikunino molwaashi otashi longo ovanafikola kombinga yefimano lounamapya.
Okwa weda po ta ti otashi yandje ohokwe kovanafikola va ka tote eengeshefa davo dokuninga oikunino ndele tava landifa oikunomwa.
“Ounamapya owa fimana moshilongo shaashi otau yambula po eliko. Otu na ovanyasha vahapu ve na oikunino molwaashi va tuwa omukumo pefimbo kwa li ve li keefikola,” ta ti.
Okwa kumaida ovahongifikola unene tuu ovo tava hongo oshilongwa shounamapya opo va yandje ehongo nouyelele kovanafikola kombinga yefimano loikunino.
“Ovanafikola nava tuwe omukumo opo va longe moikunino yavo nondjungu,” ta ti.
Steenkamp okwa ti eefikola dimwe oda ningilwa oikunino komahangano a yooloka.
Okwa weda po ta ti ngaashi ofikola Alloys Hashipara Primary nOshekasheka Combined oda ningilwa oikunino kehangano loNamibia Wildlife Resort (NWR).
Okwa indila omahangano opo a twikile okuningila ovanafikola oikunino vo va mone omhito yokulonga oikulya yavo vene.
Steenkamp okwa ti eefikola dimwe oda taalela omashongo okuninga oikunino ngaashi okuhe na omeva, eembuto nomaushosho.