Omukulunhuwiliki wehongo koshitukulwa shaHangwena Isak Hamatwi okwa pula moshiwana opo shi yambidide ovanafikola vopoUdjombala Combined noikulya, nomatalashe.

Ofikola Udjombala oi li momukunda Ohaingu moshikandjohoololo shaNgela.

Hamatwi okwa ti ovanafikola ova tembuka komaumbo nohava di pofikola molwaashi eendjila oda patwa komeva.

“Otu na ovanafikola hava di komikunda dokokule. Eendjila odo kwa li hadi ende ovanafikola odi li koshi yomeva,” ta ti.

Okwa ti ova ninga onghendabala opo ovanafikola va ka dje mofikola nelalakano va dule okutwikila neetundi davo.

“Ovanafikola ova etelela oikulya okudja komaumbo. Oikulya inai wananena ovanafikola omanga ovanafikola vamwe itava dulu okutwala oikulya kofikola,” ta ti. 

Okwa ti kukeshe ou e na ehalo lokuyambidida na kwatafane nombelewa yaye ile nombelewa yomukulunhufikola.

“Osha fimana ngeenge hatu yambidideni ovanafikola opo va dule okulihonga nelitulemo,” ta ti.

Onghela kansela woshikandjohoololo shaNgela, Elkana Hainghumbi okwa yambidida ovanafikola noukutu voufila, oshako yolwishi noshivelelwa.

Okwa ti elalakano opo ovanafikola va dule okulya nokukala va mona eenghono dokulihonga.

Hainghumbi okwa ti osha fimana ngeenge ovanhu tava shakeneke epangelo ondjilakati okuyambidida ovanafikola.

“Natango ohandi ka konga omakwafo omatalashe opo ndi yandje kovanafikola,” ta ti. –fhamalwa@nepc.com.na