Auleria Wakudumo
Ouminsteli wehongo, ounghulungu nomufyuululwakalo owa shiivifa kutya eefikola otadi ka pata mongula okulilongekidila efiku lemanguluko nefiku omupresidente omutitano taka ya koshipundi mEtitano mo21 Maalitsa 2025.
Omukulunhuwiliki mouministeli, Saneet Stenkamp okwa holola ta ti eefikola otadi pate opo va yandje omhito kovahongwa novahongi va dule okukufa ombinga mefiku lemanguluko ngaashi hashi ningwa nale.
“Eefikola oshilongo ashishe otadi ka pata Etinhe po 10h30 omanga eefikola domoWindhoek unene domashikandjohololo shaWindhoek Urban tadi ka ya kofikola mEtinhe,” Steenkamp ta ti.
Eshi osha hala kutya ovahongwa vomoWindhoek itava yi kofikola mEtinhe omanga ovahongwa vakwao moshilongo ashishe otava yi kofikola fiyo 10h30 wongula.
Steenkamp okwati eefikola domoWindhoek otadi pate Etinhe molwa omalinyengo etanga leameno taa ka kala moshikandjohololo shaWindhoek Urban.
“Omalilongekido nomalinyengo atya ngaha otashi dulika aye ehongo moshipala shaashi odoolopa otai ka kala iyadi. Ovahongwa otava dulu va kale inava fika ile itava ilwa pefimbo molwa eetuwa nomalinyengo mahapu,” Steenkamp ta ti.
Ouminsteli otau pula eefikola opo di yandje omhito kovahongwa va tyapule nokutumbaleka omupresidente mupe nomaimbilo oshoyo outevo peyandaxa mEtinhe omanga eefikola domoshikandjohololo shaWindhoek Urban ta di ka dimbuluka nokutyapula omupresidente mupe nena.
Ouministeli otau indile ovahongwa aveshe op ova kufe ombinga moshinima shatya ngaha.
Ouministeli owa weda po kutya ngaashi shili omukalo ndjiikilile, otau ka waimina Namibia alishe okutyapula efiku lemanguluko loshilongo eshi sha wanifa neudo eedula 35 oshoyo omupresidente omutitano olo tali ka kala ko kokapale komaudano koIndependence moshilando pangelo.