Iuze Mukube
Ministera gwanare gonomfi, ewapukururo evhu ntani nondima Mac-Albert Hengari gonomvhura (59) ntani mukadona gonomvhura 30 ogu vana kuvagazarera kavamonekera nkera gompanguro moVenduka kwamangastrata.
Vantu ava kavamonekere kwamangastrata kavakamonekere kwaHahende Monica Andjamba, navenye vavali kuna vatamba kutanganesa ngendeseso zopaveta ezi zakarapo. Ayo kuna kara nye ngesi asi mo 26 April 2025, momukondonoko gwaVenduka, Hengari mepuko lyenene ntani kapisi paveta kahere kuzonagwisa ngendeseso omu kagazarere asi ape munonagona kadona gonomvhura 21 yimaliwa yokusika ko N$222 000 asi ngano agusepo erapoto eli asi kwamukwatera kononkondo eyi gakarapota morwa yige gayirugana. Epangero, kakalikarerepo Seredine Jacobs, kanyokere asi vahamupa nampili nakauke asi alifutiremo, morwa sirapotwa sendi sinene unene omu sina gumu epangero, nokutanta asi kapi yina kara nefani lyewa movantu vetu, ntani age kwakuzonagwisa ekona kono eli vana kurugana vaporosi vaNamibia ndi ava vana kugava maumbangi vanakarerepo epangero. Mokugwedako, kumwe nefumadeko, kuna kumoneka asi kuvhura atunde mosirongo morwa age kwakara asi mutungi gomoGermany.
Ogo mugazarera gwauvali Edina lyendi kapi vana ligava nombudi kuna kuzuvhika asi mugazarerwa ogo ekoro lyomukadona ogo ganyanda. Mokulimburura konombudi, omu ekona kono lyovaporosi lina kutwima, Jacobs katente asi umbangi umwe wopatjangwa nare vana ugava, ano yitundwamo yomakona kono ponomahina kuna kuyindindira simpe kapio vayigwana. Hengari kavamukwete momapeu konyima tupu opo kagazarere asi afute munyandi yimaliwa yokusika ko N$222 000 ngano agusepo sirapotwa asi kwamukwatera kononkondo esi gaturamo kuhamena kwendi. Ekwato lyendi kuna tundilire mekona kono eli vana kurugana lyokuhamena komarapoto gakara nago gokusika ko 11 gou Criminal kuhamena Hengari, muna hamene ekwatero kononkondo, kuhenesa munona, kuligusa ezimo, kugava yikorwesa komunona gona, kuruganesa nye munano momudona omu gapira kukwama veta. Egazarero eli kuna hamenemo munonagona gonomvhura 21, ogu ana kutanta asi Hengari kwamukwaterere kononkondo yikando yoyinzi age nomvhura 15.
Hengari ngesi katundire moyirugana yendi youministeli mosondaha omu kakeremo hambara kwedi kumwe tupu, age kwamutuliremo mo 22 March 2025 omu gamutuliremo Presidente Netumbo Nandi -Ndaitwah. Vavali ava vana kugazarera ngesi awo simpe monomango vana kara koWindhoek Corretional Facility. Milton Engelbrecht yige ana karerepo Hengari, ano ogu nye Enos Mwakondange kuna karerepo mugazarerwa gwauvali.
–-mukube@gmail.com