Omupresidente gwoshilongo Netumbo Nandi-Ndaitwah okwa kutha olweendo lwowina oku ka talela po Angola.

Nandi-Ndaitwah okwa thiki Etine moAngola nota galuka ko nena  mEtitano.

Sha ikwatelela kombelewa yOmupresidente, shika oshikando shotango omupresidente gwaNamibia ta yi moonkundathana nomupresidente gwaAngola João Lourenço nkene a yile koshipundi momasiku 21 Maalitsa nuumvo.

“Etalelepo ndika otali nkondopaleke uukuume, uukwawowanankali osho wo elongelokumwe lya kala po nale pokati kaNamibia naAngola okuza ethimbo lyuukoloni osho wo omaupyakandhi ya kala ya taalela ayehe,” ya shanga ngaaka.

Taya ti, Namibia naAngola oya kala ye na elongelokumwe, uukumwe nombili okuza pethimbo lyekondjelomanguluko sigo onena.

Ya tsikile kutya osho shoka Omupresidente Nandi-Ndaitwah a kutha osheendo showina oku ka kundathana nkene ye na okutsikila nelongelokumwe ewanawa naashoka ye na okutula miilonga.

“Shika otashi ka za iiyimati iiwanawa, ngaashi pwa kala pe na elongelokumwe lyokukwathelathana omahooli osho wo uunamapya mwa kwatelwa uulithilo,” taya ti ngaaka.

Mehuliloshiwike natango kakukutu komatanga gopolisi Joseph Shikongo okwa li  a talele po oshigwana koongamba dhaNamibia naAngola.

Shikongo okwa li a kumagidha oshigwana shi tsikile nelongelokumwe ewanawa ihe hakulongelathana iikulumuna mbyoka tayi lopotwa kehe siku.

“Otatu lopotelwa Aanamibia taya ponokelwa nokuyugwa iinima yawo kAangola, shoka kashi li nawa. Elongelokumwe nombili nayi pangele,” ta kumagidha ngaaka.

 Ta ti, Namibia naAngola oya kala ye na elongelokumwe ihe ita pitike lyi teywe po nando kaantu mboka.

Shikongo okwa kumagidha wo aamati mboka taya landitha omahooli gangungula okupitila moombululu ye shi hulithe po oshoka inashi pitikwa.

“Ngele oya hala okulanditha naya pite komweelo. 

NAanamibia mboka ya hala okunweetha naya ka nwethe pootenga moAngola, ihe haku nwetha miihwa,” ta ti ngaaka.

Shikongo okwa kumagidha oshigwana shi kale tashi lopota iiningwanima inaayi uka kopolisi.

-vkaapanda@nepc.com.na