Ehangano ndyoka hali andjaganeke omeya moshilongo olya kwashilipaleke kutya ominino dhomeya ndhoka dha li dha lopotwa dha topa odha longwa.

Omupopilikokuluntu gwoNamWater Lot Ndamanhomata okwa lombwele oshifokundaneki shika kutya aanambelewa oya kala yi ipwakidhila nokulonga ominino ndhoka okuza uusiku womasiku 07 Mei sho omunino gwa li gwa lopotwa gwa topa momundhingoloko Okandjengedi mOshakati.

Lot okwa ti, omunino ngoka ogwa li gwa gandja wo uupyakadhi wepato lyomeya pokati koondoolopa Oshakati nOndangwa. 

“Omeya paife otaga ende nawa noondoolopa adhihe dha li dha pata omeya, odhi na omeya taga ende nawa paife,’’ ta ti ngaaka.

Ta ti, oondoolopa Oshakati, Ondangwa nOniipa odho dha li dhi na omeya kwa li ga pata.

Ndamonhomata okwa ti, ominino ndhoka odha longwa nawa nomeya oga tameka nale okweenda koondoolopa hoka.

“NamWater ota tsikile okugandja omayakulo ga pumbiwa koshigwana nokukandula po uupyakadhi awuhe ethimbo kehe,” Ndamonhomata ta ti ngaaka.

Ta gwedha ko kutya oshigwana nashi kale aluhe tashi lopota uuna sha mona ominino dha topa opo dhi longwe meendelelo.

Ta ti, oopaipi ndhoka dha li dha topa okuza kOshikuku moshitopolwa shaMusati omolwomeya gEfundju odhi li metifa okulongwa.

“Iilonga otayi ende nawa, notatu kwashilipaleke kutya konima yokulongwa omeya otaga kala taga ende nawa shi vulithe sho ga li taga ende nale,” ta ti ngaaka. -vkaapanda@nepc.com.na