OUTAPI-Omunyekadi woshilongo omutivali Penehupifo Pohamba okwa yandja omakumbafa kovakainhu ve li momateelelo 87 mewalanda loshipangelo shaUtapi.

Omakumbafa okwa yandjwa Etitatu pambelewa kungoloneya waMusati Erginus Endjala ou kwa li a kalela po Pohamba.

Okwa didilika ovakainhu ve li humbata va taalela omashongo oikwafifo ngeenge ve li komawalanda omanga vamwe ohava nangala pedu shaashi omawalanda okuyadi.

Ewalanda onhele yomuhandjo hamu kala ovakainhu ngeenge ve li popepi nokupulumuna ngeenge va hala oku kala ve li popepi noshipangelo.

Omunyekadi Pohamba oye ou a didilikwa a yambidida ovakainhu veli momateelelo, noshoyo ovanhu ve na oulema woshipa.

Omudo wa djako natango Pohamba okwa li a yambidida ovanhu ve na oulema woshipa va pewa omakende omutenya nomambale.

Endjala okwa pandula Pohamba eshi a yambidida ovakainhu molwashi paife itava va ka dengwa vali koutalala.

“Ovakainhu ve li komawalanda a yooloka ova pumbwa omakwafo unene oikumbafa nomatalashe ta ti,” ta ti.

Okwa kumaida ovakainhu opo va kale ve na ombili noukumwe ngeenge ve li komawalanda.

Lonia Paulus a dile komukunda Oshitutuma okwa pandula unene eshi va pewa omakumbafa.

“Okwa li hatu dengwa koutalala twa nangala pedu. Otwa talela omashongo a yooloka ngaashi oikulya,” ta ti. 

– fhamalwa@nepc.com.na