Auleria Wakudumo
Epangelo okupitila mehangano loNamWater ola tula po eudafano nombaanga yaGermany hai ifanwa German Development Bank (KfW) okukwafela elongo lomeva moshilongo kongushu yoshimaliwa shi fike pobiliona N$1.5. Oshimaliwa eshi osha yandjwa pamukalo weudafano leendjo kehangano laGermany, okukwafela oproyeka onhivali yomeva moshilongo hai ifanwa oNamibia Water Sector Support Program (WSSPII).
Oproyeka otai ka kwafela okuandjaneka omeva koitukulwa aishe moshilongo, okupangela ominino, okudinda omeva nokukwashilipaleka kutya NamWater okwa wanifa po oshilonga shaye shokuyandja omeva kOvanamibia aveshe. Oproyeka ei otai ka kwashilipaleka yo kutya otai yambidida oikwatelwa yomeva odula ihapu opo a dule okulongifwa kohainga unene pefimbo loshikukuta. Oule wefimbo, ovanafaalama ova kala nokunyenyeta kutya omeva modula mahapu ohaa kunguluka nokupwiinina po inaa ongelwa omanga hava kala noimuna taifi kenota pefimbo lokwenye.
Malakia Shigwedha, omukalimo womomukunda Ogongo moshitukulwa shaMusati okwa tanguna kutya omeva mahapu okwa hepa. “Epangelo okwa li li na okukala la xupa omatale nomifima a wana opo omeva a longifwe pefimbo lokwenye. Omeva aa a pumbwa okuhepa oyaa ashike itaa wana mo momatale ngeno,” ta tanguna ngaho. Eudafano eli ola shainwa koMinista yoimaliwa, Ericah Shafudah, omukulunhuwiliki woNamWater, Abraham Nehemia oshoyo omukalelipo waGerman moNamibia Thorsten Hutter.
Omupopiliko wehangano loNamWater, Lot Ndamanomhata okwa holola kutya oWSSP II otaka tameka noproyeka yokulonga omunino wakula pokati kOmundaungilo nOmutsegwonime.“NamWater otaka kwatakanifa eekilometa 130 pokati kOmundaungilo nOmutsegwonime, okuboola eboola, omifima nomatale ponhele opo,” Ndamanomhata ta ti. Ndamanomhata okwa ti ovanhu 27 000 otava ka mona omeva moshitukulwa shaHangwena oshoyo moshitukulwa shaShikoto eshi tava ka tula ominino domeva pokati keenhele edi mbali. Eshi itashi kwafele ashike ovanhu va mone omeva ma yela ndele otashi ka kwafela yo mouhaku wavo nokushunifa pedu omafyo omikifi ngaashi oChorela nokukwatela po oundjolowele noukoshoki.
“WSSP II ota ka kwafela yo okulonga omunino womeva pokati kOshakati, Ondangwa, Oshali, Omuthiya nOmutsegwonime,” Ndamanomhata ta ti. Minista woimaliwa, Ericah Shafudah okwa holola kutya ekwafo la yandjwa kuGermany ola fimana opo epangelo li wanife po omaudaneko nomalalakano alo oo la ningila oshiwana. “Eudafano eli otali holola kutya epangelo oleli tula mo mokukonga omakwafo a yooloka opo li dule okuwanifa po eemhumbwe doshilongo,” Shafudah ta ti.
Shafudah okwa holola yo kutya eudafano leendjo eli otali dulu okufutwa moule weedula 20 ashike ova pewa natango oule weedula nhano komesho defilonghenda.
Omukulunhuwiliki woNamWater, Abraham Nehemia okwa holola kutya eudafano eli ola tulwa po kwa talika keemhumbwe dopombada moshilongo. “NamWater okwe li longekida omayakulo opombada koshiwana okudja kokufa ominino nokukwashilipaleka kutya otwa tula mo dimwe dipe nokudida omeva ma kaka opo ovanhu va dule okunwa,” Nehemia ta ti. Omukalelipo waGeramany moNamibia, Thorsten Hutter okwa holola kutya eeproyeka domeva itadi kandula po ashike omhumbwe yomeva moshilongo ndele otadi ka kwashilipaleka yo kutya enota ola kandulwa po monakudiwa.