GROOTFONTEIN-Omuulikwa hoololwa woSwapo ta ka kufa ombinga momahoololo oukansela moGrootfontein okwa ti ngeenge okwa hoololwa ota ka tungila oshiwana komalukanda oundjuwo nokuyambidida ovanyasha mokutota po eengeshefa davo.
Nelao Amagulu okwa li ta popi pefimbo loshikonga shomahoololo sha li ko Osoondaxa kodoolopa yaGrootfontein.
Omahoololo a wedwa po ota ningwa konima eshi ookansela vamwepo va dja koikandjohoololo vaya keumbo lomutumba wopashiwana, notaa ka kala ko momufiku 17 Juni 2025.
Ngeenge Amagulu okwa findana omahoololo oukansela ota ka ninga kansela woshikandjohoololo shaGrootfontein lwoshikando oshitivali.
Okwa li nale kansela okudja omudo 2018 fiyo 2021.
Amagulu okwa ti ota ka twikila okumanifa eepoloyeka odo di li konima ina di pwa ngaashi okuyambula po oshikondo shounamapya moshikandjohoololo shaye.
“Ohandi ka kwatafana nouministeli wehongo opo tu kundafane tu tungilwe endiki lopaungomba modoolopa yetu molwashi ka munasha endiki lopaungomba,” ta ti.
Amugalu okwa weda po ta ti ota ka kwatafana nouministeli womangeshefelo opo u kale tau yambidida ovanyasha nomikuli okutota po eengeshefa davo.
“Ombelewa yange otai ka longela kumwe nopolifi opo tu kandeke oimbuluma unene tuu kombinga younona va ninga oihakanwa yokukwatwa onghonga,ta ti.
Pefimbo loshikongna, omupedu Pilimaminista Natangwe Ithete okwa lombwela oshiwana opo shi ye momwaalu muhapu okukahoolola Amagulu molwashi omuwiliki muwa ta ka etela oshiwana omayakulo popepi.
“Ina mu ninga epuko mu ka hoolole ovanhu tava di keengudu domilamenho. Swapo oyo ashike ongudu tai dulu okulela oshikandjohoololo eshi molwashi Swapo oku na oshisho noshiwana,”ta ti.
Okwa weda po ta ti moshikandjohoololo shaGrootfontein omu na eepate, eefikola noipangelo ya tungwa kepangelo ta li wilikwa koSwapo,” ta ti.
Vamwe vovakalimo vomodoolopa yaGrootfontein ova lombwela Kundana tava ti Amagulu okwa li nale kansela ashike okwa dopa okuetela oshiwana omayakulo popepi.
“Na yandje omhito kuvakwao navo va ninge kansela. Otu na ovanhu vahapu voilyo yoSwapo mwa kwatelwa ovanyasha tava dulu okuninga kansela,” umwe womukwashiwana ta ti.
Ovanyasha ova ti ova hala kansela ou ta kandula po onghalo yokuhe na oilonga kovanyasha noshoyo okutotapo eepoloyeke dovanyasha.