Auleria Wakudumo
Okatseidhi – Ovakwashiwana vomomudingonoko wOkatseidhi mOtsandi ova lukila Omuprima minista Elijah Ngurare okapale komaudano kopomukunda wavo.
Okapale komaudano oko kali haka ifanwa Okatseidhi paife oka ninga Hon.Dr. Tjitunga Elijah Ngurare.
Mwene womukunda Okatseindhi, Aina Shigwedha okwa holola kutya ova ninga omatokolo okulukila Omuprima molwa etumba nounwa oo vena eshi umwe womuvo a ninga oshilyo shomutumba wopashiwana.
“Ngurare keshi ashike Omuprima minista woshilongo, ashike okaana ketu, ke tu udifa ounwa nounambano eshi ka ninga Omuprima woshilongo. Ehafo eli itali tyapulwa ashike momukunda wetu ndele omoshiwana ashishe shaUukwaluudhi moshitukulwa shaMusati,” Shigwedha ta ti.
Pefimbo tava tyapula omona Ngurare, ovakwashiwana ova holola omaudjuu amwe oo va taalela pomudingonoko wavo ngaashi exumokomesho nova indila epangelo opo li va shakeneke ondjilakati opo va dule okufinda omaudjuu amwe oo.
Inava holola ashike omakemo avo ndele ova yandja yo omaliudo avo nghene epangelo lina okukandula po omaupyakadi avo.
Mwene womukunda okwa yandja edu leekilometa 20 nalimwe la nhuninwa ounamapya.
“Otwa yandja edu eli netimaumbwile kutya epangelo otali tu kwafa opo tu dule okuyambula po omukunda wetu,” Shigwedha ta ti.
Omuprima okwa patulula pambelewa okapale oko a lukilwa nokutwikila okutalela po oupale va yooloka moshitukulwa shaMusati.
Eshi Omuprima okwe shi ninga sheli kwatelela keindilo olo la ningwa kOmupresidente woshilongo, Netumbo Nandi- Ndaitwah eshi a indila ku yambulwe po oupale vomaudano moshilongo.
Ngurare okwa twikila okutalela po okapale komaudano kaTsandi oko a patulula pambelewa ekopi lomukulun huwiliki wOtsandi Village Council.
Ngurare okwa holola olupandu kovaunganeki vomaudano a yooloka moshitukulwa.
Okwa indila ovaunganeki novakwateli komesho opo va tale omaudano onga oshinima sha fimana osho tashi dulu okuyambula po eliko loshilongo.