Ouministeli wouhaku nonghalonawa owa landa eeambulansa di li o36 kongushu yoshimaliwa shi fike peemiliona oN$32. 

Minista wouhaku, Dr Esperance Luvindao okwa holola kutya eshi oshi li shimwe shomomalalakano ouministeli okukwashilipaleka kutya owa yandja omayakulo ongushu, pefimbo kovakwashiwana. 

“Eeambulansa otadi ka topolelwa oitukulwa aishe o14 moshilongo okukwafela ovakwashiwana,” Luvindao ta ti. 

Nonande ouministeli wa landa oihauto ipe, minista okwa holola kutya osha fimana unene okufila oshisho oihauto oyo opo i dule okulongifwa oule wefimbo nokukalela ouministeli. 

Okwa ti, mouministeli wouhaku kamu na ekwato nawa loinima unene oihauto. Minista okwa indila ovanambelewa mouministeli wavo opo va kwashilipaleke kutya ova kwata nawa eeambulasa odo da yandjwa. Luvindao okwa holola yo kutya eshi ounyuni tau ende nokulunduluka noutekinologi wa uka komesho, osha fimana yo okulundulula oipumbiwa oyo ha tu longifa paife i kale moshinanena. 

“Ondi na etimaumbwile kutya efiku limwe ohatu ka kala tu na eeambulansa depangelo dopashinanena moNamibia. Eshi otashi ka kwashilipaleka kutya itatu ka kanifa eemwenyo dovakwashiwana vetu molwaashi kape na osheendifo ile sha fika olaata,” Luvindao ta ti. 

Luvindao okwa ti kutya omhumbwe yoyeendifo otai ndana onghandangala moitukulwa ihapu yoshilongo. 

Eeambulasa edi otadi ka kwafela ovakwashiwana aveshe, mwa kwatelwa ovakwashiwana koushai okukwashilipaleka kutya kape na omunhu a patelwa kodje ngeenge tashiya kouhaku. 

Omukulunhu moshikondo shouhaku moshitukulwa sha// Kharas, Dr Refanus Kooper, okwa holola olupandu eshi oshikondo shavo sha pewa oyeendifo. 

Kooper okwa ti ova ninga oule wefimbo vena omhumbwe yeeambulansa ashike paife okuwete va kufwa omutengi mudjuu komapepe avo. 

“Ondi shi shi kutya eeambulansa edi otadi ka kwafela moitukulwa aishe ngaashi da nhuninwa kouministeli,” Kooper. 

Kooper okwa ti eifano laminista okukwatela po nokukaleka po oihauto youministeli la fimana nola pumbwa okukalekwa po. 

“Ohatu ka shikula eeambulasa adishe opo tgu kwashilipaleke kutya odi li monghalo iwa nohatu ka katuka onghatu yopombada okushikula keshe ou ite liufa keemhango,” Kooper. 

Ngaashi elalakano lakula lomudo o2030, Luvindao okwa holola kutya ouministeli otau twikile okuyambula po ouhaku moshilongo. 

-psiririka@nepc.com