Omupresidente Netumbo Nandi-Ndaitwah okwa ti aanandholongo ye thike 13 898 mboka ya kala komazulonkalo pokati ko2017 no2018 oya lundulula oonkalamwenyo dhawo okupitila mooprogalama hadhi gandjwa ko. 

Omupresidente Netumbo Nandi-Ndaiwah okwa popi ngaaka momushangwa gwe gwa leshwa peha lye kOmuprimaminista Elijah Ngurare, sho kwa pitithwa mo iilyo iipe yi li 278 yoshikondo shomazulonkalo noondholongo ohela kOmaruru. 

Iilyo yoshikondo shomazulonkalo oya pititha aakiintu 97 naalumentu 181. 

Oshiindingili shoka osha ningilwa kehala lyomadheulilo ta li ithanwa Lucius Sumbwanyambe. 

“Ooprogalama ndhoka hadhi gandjwaongaashiomazulonkalo osho wo “Life skills” dhoka dha dhana onkandangala okulundulula oonkalamwenyo dhoyendji ya yono, noya li ya pewa omageelo,” ta popi ngaaka. 

Ta ti, yamwe oya li ya pewa omagelo omolwiilonga ya longo omanga ya li ya thigwa po komadhiladhilo omolwomatompelo ga yooloka. 

Ta gwedha po kutya natango oondholongo dhomazulonkalo ohadhi gandja wo omalongo guunamapya okupitila mooprogaama ndhoka, shoka natango tashi yambidhidha okuhwepopaleka onkalo yiipalutha moshilongo. 

“Oondholongo dhomazulonkalo natango ohadhi kunu iilya yokuninga oomboloto osho wo yuusila wokulya. Ohaya eta po wo onyama yawo yene yoshingulu,” Nandi-Ndaitwah ta popi ngaaka. 

Ta gwedha po ta ti ihaya gandja ashike iikulya mbyoka koondholongo dhawo ihe noketanga lyopolisi. 

Nandi-Ndaitwah okwa pandula mboka ya li ye shi enditha nawa sigo ya mana omadheulo gawo, ta ti naya ka longe nuudhiginini. 

“Ayehe mboka ya li ya taambwa okuza petameko oya li 280, ihe mboka ye shi enditha nawa oy eli 278, yaali oya ndopa okugwanitha po oompango, noya li ya lalekwa,” ta fatulula ngaaka. 

Iilyo yomazulonkalo esiku ndyoka oya li yu ulike uunkulungu wayo. 

-vkaapanda@nepc.com.na