OUTAPI – Derfina Mapnder a dile komukunda Ogongo moshitukulwa shaMusati okwa ti okwe ya komaulikilo oipindi kOlufuko opo a landife omatiti noitoo oyo a honga, a longifa ounongo e u pewa kuinakulu. 

“Onda kulila pumeekulu okudja kounona. Onde lihonga shihapu kombinga yomifyuululwakalo shaashi okwa longa nge oilonga yOshiwambo,” Mapnder ta ti. 

Ovanangeshefa va yooloka otava kufa ombinga koshivilo shOlufuko kOutapi oo a tameka momafiku 20 notaa ka xula mefiku 1 Juli. 

Oukadona 148 va dja koitukulwa ya yooloka otava kufa ombinga okufukala kOlufuko. 

Omunyasha ou okwa hokolola ta ti oipindi otai ende nawa shaashi okudja efiku lotete ovanhu otava holoka momwaalu muhapu okulanda oilandifomwa yavo. 

“Onda pandula meekulu shaashi ngeno ka li po ngeno inandi mona omhito yokukala ndi shi okuhonga omatiti,” ta ti. Okwa ti oha hongo oihongomwa ya yooloka, ngaashi eembiya, oulwio wokutula odjove nosho yo tuu oihongomwa ya yooloka yOshiwambo. 

“Ohandi landifa alushe komaulikilo oipindi shaashi oko unene ku na ovalandi vahapu,” ta ti. 

Okwa fatulula ta ti omatiti okwa fimana okulongifwa momaumbo shaashi oha longifwa koivilo ya yooloka unene omafundula. 

Okwa yelifa ta ti ngeenge owa i meumbo lOlufuko oto hange ovanhu tava lile momatiti osho tashi ulike efimano lomufyuululwakalo. 

“Ovanyasha vahapu ove na ounongo ashike inava hala okulongifa ounongo wavo. 

Osha fimana ngeenge omunhu ta longifa ounongo waye opo a dule okulikongela oyuuyemo,” ta ti. 

-fhamalwa@nepc.com.na