OUTAPI – Hamushangandjai wongudu yoSwapo Sophia Nahango Shaningwa okwa tanga Omukokolipresidente Sam Nujoma ta ti okwa li kaume koshili kOlufuko molwaashi oye umwe womovaleli va tota po Olufuko.
“Nujoma okwa li a fimaneka omufyuululwakalo wOshiwambo. Okwa kala ta yambidida oshivilo shOlufuko opo shi twikile komesho,” ta ti.
Edi Shaningwa okwe di popya oshivike sha dja ko kepatululo pambelewa loshivilo shOlufuko osho shi li kOutapi moshitukulwa shaMusati.
Oshivilo osha patululwa pambelewa komupilimaminista Elijah Ngurare notashi xulu mongula. Oukadona 138 va dja koitukulwa ya yooloka ova kufa ombinga kOlufuko.
Oshivilo osha etela ovanangeshefa vashona oyuuyemo molwaashi ovanangeshefa ve dulife 60 nosho yo omahangano a yooloka okwa li tava kufa ombinga kOlufuko. Shaningwa ou a popya e li meemhadi dOmukokolipresidente Nujoma okwa ti osha fimana ngeenge ovanhu tava fimaneke nokukaleka po omifyuululwakalo davo.
“Omukokolipresidente Nujoma okwa li alushe ha popi ta ti omunhu ngeenge ke na omufyuululwakalo okwa fa ashike omuti uhe na omidi ile okaana kehe na edina,” ta ti. Okwa ti Nujoma okwa kala alushe ta xwaxwameke oshiwana shi kale nombili, oukumwe nosho yo okukaleka po omifyuululwakalo davo.
Shaningwa okwa ti oshivilo shOlufuko otashi twikile komesho ngaashi naana Nujoma kwa li e hole okutya ovanhu inava pwilikina omahokololo oipupulu kutya Olufuko oupaani.
Omupilima woshilongo Elijah Ngurare okwa yelifa ta ti Olufuko kali fi oupaani ndele otali kaleke po efimano lomifyuululwakalo neenghulunghedi dOshiwambo.
Okwa ti Olufuko ofikola tai yandje eetundi koukadona nghene ve na okulihumbata fiyo va ninga ovakainhu voshili. “Olufuko ola etela oukadona ouwa molwaashi ounona vahapu ohave lihumbata nawa konima yokufukala,” ta ti.
Maria Shiponeni okwa yelifa ta ti okadona inave uya okukonga ovalumenhu kOlufuko ashike ove uya okupewa ehongo kombinga yefimano lomufyuululwakalo.
Okwa ti oilonga yaye ongaNamunganga okutala ngeenge oukadona ove na omateelelo nosho yo okutala ngeenge otava wanifa po oinyangadalwa oyo tava ningi pefimbo lokufukala.
Okwa weda po ta ti ovafuko ohava ningi oinyangadalwa ya yooloka ngaashi okudunga omalodu, okutwa oilya nongava nokulonga poshipale nosho tuu.
“Ame onda tema omundilo tete meumbo lOlufuko omu. Omundilo owa fimana molwaashi otau eta po elandulafano pefimbo loshivilo shOlufuko,” ta ti.