“Hi nokutjiwa kutja Nganate omuini ma purwa na tja morukondwa ndwi wa yeta kovikeṋa? Me zemburuka kokutja pe yere ozondooha zozonyama zOmeatco poṋa mba. Omeatco tji ya ri moruhindo rokukwizika kokutja mape tungwa ovyunda vyomarandero vyozongombe. Ovyunda mbyo omambo vya tungwa? Ami ootjiṋa tji matji ya tjimanga okuzemburuka ondambo yongooneya Nganate korukondwa ndwi,” Mbeuta Ua Ndjarakaṋa omuture wa Eiseba mOmaheke ma tja, tji ma teza ozondambo za Pijoo Nganate nai ngwa yarurwa po i yOperesindenda Netumbo Nandi-Ndeitwah otjOngooneya ya Maheke. Nguri ongooneya aiyerike okuza kozongooneya zomuyaruke Hage Geingoba ngwa sewa motjihavero tje.

Komurungu Ua Ndjarakana ma tja mu notjiwaṋa tja Eiseba nai tji tja tjiti ozombura o-29 okuza nokukotoka koutaure wehi ra Tjauana ovaṱi novakuru vawo kuvataurire notjo ku tja kakwaterwa. Posi ya ngamba katji ya rora okuhandurisiwa nu Nganate ae kara orupa rwovahandurise. Otje hi nokutjiwa nandarire kokutja ingwi NNN omuini u norutjato ndu ṱa pi okutwa ozondekurona nḓa kekwamo rwomahupisiro nondungiro mehi roo ihe omukururume mba pandjara omahi “mbe ha rorisirwe okasarama nandarire kemwe?” 

Ongooneya Nganate wa kara orupa nomahandurisiro nu kape novandu va Eiseba mba handurisiwa ngaa kwami nguno ngwi umwe wovarwira wongutukiro mba varwa mba zemburukwa hi nokaṋa ku mba muna.” Ua Ndjarakaṋa otje hi nokutjiwa kutja kehi ya NNN, Nganate u notjikwaye tji ma twara kotjiwaṋa tja Eiseba. Na indjo’horomende ndji ri po wina okutuurungira muye. Nandarire kokutja ondjira ombapa opu iri i munika mu novirongo ondjendjeto nayo mu mwa tura ovandu posi ya ku ku hi nozondjira. Ua Ndjarakaṋa ma tja. Naṋi ozondjira inḓa tji za pwisiwa maze nyomokisa ombwiko nomekurisiro mozondendera. 

Nganate wa rira ongooneya ya Maheke mo 2020 tja yarukira po Festus Ueitele, kari omuyandjandunge wapeke. Zarwe oo Kadiva Hamutumwa (Ohangwena), Hofni Iipinge (Oshana), Natalia Goagoses (Erongo), Dorothy Kabula (Zambezi), Dawid Gertze (||Kharas) na Immanuel Shikongo (Omusati) avehe imba mba zikwa oupe.