Ovahepauke novanaukaiya mOtjijarua tja Pukiro omayuva womasuviro nga zuko va honyonokere nokuparurwa nonguta yovihepwa pekepeke.
Mu mu novirare otjoruveze rwokupepera, novizarwa tjimuna ozombanda nozongaku. Okuza kotutu twotjari pekepeke Ogreat Hearts Foundation nOjessica High Five Foundation nohauzeu yozonongo motjitamba tjomatungiro wozondjuwo vonganda indji Helios Engineering Consultants. Oyo nomberoo yOrata yOkarukondwa ka Pukiro wina tji va karere nehungi ohunga nombatero kOvakuruha.
Otjinanambango tjapeke wina vari ovasukona oveni mbu mave tja “otuperanyara” mberi motjirarakaneno tjomusukona omuwamuwa wozonganda nḓe ha wire kehi yohoromende ovengi mbaave vetasanene pozonḓuve. Mu mwari orata yotjirongo Omuhonge Joshua Kamurongo; Orata Uahatjiri Makono; Omuporise wOtjiwaṋa wOndjeverero yOurunnga wOvinamuinyo, Dave Kavari notjiuru otjikuru, nai tji tja twiire ondjoko pehi, Urbanus Uajkuzako Kavari. Ouṋingandu tjandje Orata ya Pukiro, Paki Pakarae ayo orukoro pokati komaoko kutja ovarumendu ave ha vetasanene ozonḓuve povasukona imba. Nandari kuza omasa ya sewa nozondambi.
Ape otjikando otjitjatano nai otutu twi okunyanganyangisa ombatero nokuivasisa kovahepauke ku ku he ri kOtjijarua atjiyerike uriri nungwari movirongo vyarwe na mouparanga wehi apehe pu pe noukaiya otja komasa nomasorero wato. Tjingetjo omayuva womasuviro nga zuko vovirongo ondjendeto tjimuna Otjombundiro, Ozombouvapa, Okarindikotjimburu, Otjiwarongo na Komumbonde va parukire.
Ondando irira kutja ape, ve tjite nao tune mombura. Okuiisira kouhepe tji va mbu rira ouputuke tjimuna omipupo na imba mba nyosisa ozondjuwo. Ozombatero nḓe ri ozonyanginyangisiwa uriri nḓe za kouharupu woviwaṋa. Wina nḓe hepa okuvasisiwa ku maze hepwa tje he ri otjiṋa otjipupu tjinga ouṋepo ouini au riyaruka mozondjaṱu zawo.
Okutja munao otjiwaṋa otji matji kuwa kutja tji rikwambe kotjiungura itji komayandjero wovihepuwa vyarwe ngu maye kongorere ngu maye kutja nai otjiungura itji tja tuwa kekwamo okuza pu itjo tjomayuva womasuviro nga zuko. Ngumeriṱiza Kuhanga wOgrateful Hearts (Omitima vyOkunenekuhepa) ma vasewa po-0814104554 motjiwaṋa tji pe na mbe nonḓero nouharupu wokurikwamba kozongondjero zawo zokuvatera ovahepauke avehe pekepeke otja kondjuriro yawo. Muwo wina mu muna ovaremane.