Omaueuozonjanda, Omongua na Tjombinḓe nai vi sokuuta okurongerera okurira ovihuro otja kozondando zongooneya ya Maheke.

Pijoo Nganate, katjisupi nguri eye erike mozongooneya zoruveze rOperesindenda ya Namibia oitjatatu, omuyaruke Hage Geingoba, ngwa ṱire ombura ndja zuko mu Tengarindi, wa yarurirwe motjiṱo tjingetjo i yOperesindenda ombe, Netumbo Nandi- Ndaitwah.

Nganate Omandaha otja tjivisire orukondwa rwe rwa Maheke, na indi ehi arihe ra Namibia, kutja nai ruri mongee ngaro tjinene mombwiro na mombwiko mu mu nehupo nongaro yovature varo. 

Mehungi nde kara naro ombura aihe, ndi tjiukwa otjEhungi Rombwiro yOrukondwa, Ostate of the Region Address, ousupi OSORA. Mombepo tjingetjo Oeiseba nOtjaka mavi ririsiwa ouhurona. Mokutja kape novapwike mbu maveeku pwikira movirongo tjimuna mbi vyondondo yomekurisiro yavyo ndji hi na pu iṱa kaparukaze nonḓengu wina yomauini wavyo, tjimuna ozondjuwo, nḓe hi nonḓengu ndji ṱe i pi. 

Nganate u nongendo nokuhina omekuriro wovirongo. Mu tjimwe tjavyo mu mu noukongotwe wavyo oko mu nao wina ku ku ha nana ovapwike. 

Nandarire wina na imbo ovature vyavyo kave vi ryamisa komeho na komurungu tjinga owo wina na indjo ongombe yawo ai yandera motjinyo na momazumo wawo ngandu komukova wayo. Pu mape hee kutja kai kaungura otjiṋa tjarwe nandarire ozongaku. 

Tjinga ongombe ai za morukondwa kotjikoti na avihe mbya sokuza muyo avi karira oviungurwa vyopendje norukondwa oruini.

Okutja mu nao wina otjaimwe yozondando zOngooneya okutja kangamwa apehe morukondwa pu mape kayenda otjiungura ovature momuano umwe poo warwe mave sokutja ve na tjimwe poo tjarwe tji mave randisa. Ma tja eraka rovature vorukondwa oveni mari sokuzuvakwa. 

Munda umwe orondu ovo tjive ri pu pe novitjitwa mbi mavi kayendisiwa morukondwa rwawo. Orondu ndino tji va yeta eraka rawo norupa ohunga na imbi mbi mavi nyinganyinga morukondwa. 

Mu nao otji mave yenene okuramba ondjara na wina okuhina okurya ovikurya mbi ha tungu orutu, nu tjinene rovanatje na vyarwe mbi yeta ongurunguse mehupo rawo. 

Tjarwe Nganate ma tja omananeno wotumbo momahi otjiwangungu otjikendise neye ma yandja ko ombango. 

Tjingetjo oturokoho mozombuharwa tu tu ha yandjere ovahongwa okurihonga. 

Ondjira komurungu ma ninigire ovature okurikwamba kuye nu tjinene otjepango, muro mu mu nongutasaneno pokati kawo eye ndji ma munu kutja mai tjiti kutja ve toorere tjimwe nu nai ve pasane omasa momekurisiro, nu tjingetjo mozongondjero ze zokuvepangiṋa nomekurisiro.