Omupresidente Netumbo Nandi-Ndaitwah okwa kumaida ovanailonga tava longele mepangelo opo va ya kule nawa oshiwana pehe na omunhu ta ningilwa okatongo molwashi ova pewa oshinakuwanifa shokukala meembelewa koikondo ya yooloka yepengelo.
Edi Nandi-Ndaitwah okwe di popya Etitano pefimbo loshipopiwa shaye osho a longekidila ovanailonga avashe ve pangelo koikondo ya yooloka.
Okwa ti omunailonga keshe wepangelo ta longele koshikondo shonhumba ile omuleli wepangelo okwa pumbwa okuyakula nawa oshiwana molwashi eembelewa oda nhuninwa okuyandjaneka omayakulo koshiwana.
Omupresidente natango okwa dimbulukifa oshiwana opo shi kale shakotokela oulingilingi shaashi owa nyika oshiponga notau teya po oshilongo. Pefimbo Nandi-Ndaitwah a nangekwa pambelewa a ninge Omupresidente okwa popya ta ti ombelewa yaye itai ka longela kumwe novanhu tava longifa oulingilingi.
Pefimbo a li aulika eeminista dovapeduminista, Omupresidente okwa yandja ekumaidokokabinete yaye opo iha longife oulingilingi.
Nandi-Ndaitwah okwa denga omufindo ta ti omunailonga keshe wepangelo okwa fimana naashi osha eta opo a pewa oshinakuwanifa sha kula mombelewa yepangelo.
“Lipuleni kutya elalakano leni lokulongela mombelewa yapangelo ola shike,” Omupresidente ta pula.
Okwa ti ina hala okumona ovanailonga vepangelo tava longifa ashike eembelewa depangelo oku li monena omauwa avo opaumwene ashike ovanhu vamwe itava mono omauwa.
“Kwa teleipo nawa eedjo nomaliko epangelo. Kaleni muna oukumwe nelongelo kumwe meembelewa,” ta ti.
Okwa yelifa ta ti Namibia ota xumu komesho ngeenge ovanhu ve na ombili, oukumwe nelongelokumwe lokuyambula po oshilongo.