Auleria Wakudumo
Ehangano loNamWater ola shivifa kutya ola hovela okupata omeva oufiku fiyo okeengulasha moshitukulwa shaShana, Ohangwena osho yo moshitukulwa shaShikoto.
Omupopiliko waNamWater Lot Ndamanomhata okwa holola kutya NamWater okwa tameka nale okupata omeva okudja Omaandaxa nota twikile fiyo omo16 Aguste 2025.
“Omeva otaa kala haa pate mokati koufiku okudja po22h00 fiyo 04h00 yokeengulasha,” Ndamanomhata ta ti ngaho.
Ndamanomhata okwa ti omeva otaa pate molwounghundi wokupomba omeva okudja mondama okuya koitukulwa ya tumbulwa metetekelo.
Nande ongaho, Ndamanomhata okwa ti ovanambelewa vaNamWater ova longa noudiinini okukwashilipaleka kutya ovakwashiwana ove na omeva unene pokati keevili odo hadi pula va longife omeva efimbo keshe.
NamWater ota indile oikondo aishe oyo tai ka kala momhumbwe yomeva ngaashi oipangelo noukilinika, oitaasi yopolifi osho yo eefikola opo di kwatafane novanambelewa meendelelo.
“Otava indilwa va kwatafane nomukulunhu wokuandjaneka omeva moshitukulwa shaShana, Ohangwena nOshikoto konomola yongodi tai shikula, 081 272 794 5 ile omukulunhu moshitukulwa shaShana nOhangwena nongodi 081 124 559 7 ile omukulunhu moShana nOshikoto nongodi ei, 081 145 526 7,” Ndamanomhata ta ti.