EENHANA – Omupresidente Netumbo Nandi-Ndaitwah okwa ti okwa udifwa nai koshikumungu shovahongifikola vatatu ovo ve limangeleka oshivike sha dja ko moshitukulwa shaHangwena. 

“Efiku nde shi uda inandi kofa. Kashiwa kovahongifikola tave limangeleke,” ta ti. 

Edi Omupresidente okwe di popya Omaandaxa pefimbo kwa li tava patulula omaulikilo oipindi aEenhana pambelewa. 

Omaulikilo oipindi okwa tameka oshivike sha dja ko notaa xulu momafiku 2 Aguste. 

Okwa ti oshivike sha dja ko kakwa li shiwa konima eshi a uda onghundana yomafyo ovanhu vane ve limangeleka mwa kwatelwa omukainhu umwe. 

“Ovanhu ve limangeleka ove li ovanashilonga tava yakula kwa li ovanafikola keefikola. Oshi li tashi limbilike unene,” ta ti. 

Okwa kumaida Ovanamibia opo va kale ve na oukumwe wokuyambididafana unene tuu ovanhu ovo tava hepekwa koupyakadi wopamadiladilo. 

Pefimbo Nandi-Ndaitwah e li komaulikilo oipindi aEenhana okwa pandula eedoolopa eshi tadi twikile nokuninga omaulikilo oipindi molwaashi otaa etele eedoolopa oyuuyemo. 

Okwa ti omaulikilo oipindi otaa xumifa eedoolopa komesho ngaashi okuyandjaneka omayakulo popepi noshiwana. 

“Ovanhu nava longife omhito okukufa ombinga yomaulikilo oipindi osho yo okulandifa oihongomwa yOshiwambo,” ta ti. 

Okwa ti omaulikilo oipindi aEeenhana okwa etela ovanyasha omauwa molwaashi ova mona omhito yokulandifa oilandifomwa osho tashi kelele ondjala noluhepo. 

Omupresidente okwa ti epangelo ola tula poshitaafula oshimaliwa shonhumba tashi ka yandjanekwa kovanyasha koitukulwa ya yooloka opo va tote po eepoloyeka davo. 

“Pefimbo ovanyasha tava ka pewa oshimaliwa inava ka landa nande omalodu molwaashi oshimaliwa osha nuninwa okueta po eepoloyeka odo tadi etele ovanyasha oyuuyemo,” ta ti. 

Nandi-Ndaitwah okwa ti epangelo otali twikile okuyambidida ovanhu unene tuu okuyandjaneka oikulya yoshikukuta osho yo okuyambidida ovanafikola. 

Okwa kumaida Ovanamibia opo va twikile okukala nombili noukumwe. 

-fhamalwa@nepc.com.na