Auleria Wakudumo 

Ombelewa yOmuprima oya lundululila ovakulunhuwiliki komauministeli oko vakala okudja eshi va ulikwa kOmupresidente eemwedi mbali daka pita. 

Ombaapila yadja kuhamushanga wokokabinete Emilia Mkusa oya holola kutya ombelewa yOmuprima oya pewa epitikilo okudja kokakomisi koPublic Service hano okakomisi oko haka ungaunga nomayakulo ovakwashiwana oku lundulula ovanailonga vepangelo. 

Mkusa okwa ti omalunduko aa otama ka tulwa moilonga okudja nena noovakulunhuwiliki aveshe ova teelelwa va tameke oilonga nena mouministeli wavo mupe. 

Omalinyengo aa okwa kwatela mo Audrin Mathe oo a li omukulunhuwikili kouministeli womauyelele nomakwatafano opaungoba oo paife a ya kouministeli wouyuuki noilonga. 

Otaku hokololwa ouministeli womauyelele tau ka pewa omukulunhuwiliki mupe nale. 

Ben Nangombe okwa kufwa kouministeli woikwamina noikwanghono a uka kombelewa yomuprima woshilongo. 

Nghidinua Daniel okwa dja kouministeli wouyuuki a uka kouministeli woikwameni neameno lokeengaba. 

Eeministry dimwe edi da kula ngaashi ouministeli wehongo owa pewa ovakulunhuwiliki vavali. 

Ouministeli wehongo owa pewa Erastus Mbumba Haitengela oshoyo Gerard Vries. 

Erastus Haitengelao ta kala ena oshinakuwanifwa shehongo, omaudano noungoba omanga Vries ta kala ena oshinakuwanifwa shomaudano nomayakulo oshiwana moshilongo. 

Ndiyapuki Nghituwamata ota kala natango kouministeli wounamapya, ounaimuna nomatalululo edu omanga Teofilus Nghitila ta kala ena oshinakuwanifwa shomeva neeshi mouministeli umwe. 

Omanga Moses Pakote a tulwa paife kouministeli woikwamina noikwanduluki. 

-wakudumoauleria@gmail.com