Auleria Wakudumo
Epangelo laNamibia melongelokumwe noEuropean Union (EU) ova patulula pambelewa onhele opo tapa ka tungwa oshiunda sheengobe koshikunino shepangelo kEtunda.
Opoloyeka ei oina ongushu yoshimaliwa shi fike peemiliona N$78.9.
Oshiunda eshi otai ka kala hai dulu okukala eengobe di fike pe-1 000. Osha nhuninwa okukwafela ovanaimuna unene vokomikunda opo vaha ende vali oinano ile okutwala eengobe koutomenho vokokule ile keenhele dimwe vaka konge omakwafo oimuna yavo a wedwa po.
Oshiunda eshi sha patululwa pambelewa kEtunda oshili shimwe shomeproyeka daEU odo tadi lalakanene okukwafela ovanaimuna vokomikunda moshilongo.
Ehangno loilongo laEuropa yahangano ola holola kutya ola tula po omutengenekwafaneko weemiliona N$400 okukwafela ovanaimuna vokoushai moNamibia.
Oproyeka ei oya tulwa moilonga kouministeli wounamapya nounaimuna, nokakomisi koNational Planning.
Minista wounamapya nounaimuna, eeshi, omeva nomatalululo omadu Inge Zaamwani okwa ti oshiunda eshi osha tulwa po opo ku wanifwe po oilalakanenwa yepangelo yokukandula po ondjala noluhepo mounamapya nounaimuna.
“Oshiunda shomEtunda oshili shimwe shomeeproyeka heyali dili koshi yoprograma ei omo mwa kwatelwa yoo okulongulula outomenho, eenhele dokuvenda oimuna, eenhele dokulandifila oimuna, oshoyo eenhele ile oyuunda yokufiila oimuna oshisho moshilongo ashishe,” Minista ta holola.
Zaamwani okwa holola yo kutya epangelo oleli pyakidila nokulonga eeproyeka deenhele doimuna da tumbulwa metetekelo.
Okwa weda po ta ti ouministeli wounamapya nounaimuna owa yandja omaloli oshoyo oyeendifo imwe ya wedwa po omwedi wa dja ko okukwafela natango ovanaimuna vokomikunda.
Omakwafo aeshe taa yandjwa koEuropean Union melongelokumwe nouministeli wounamapya otaa ka kwafa ovanafaalama opo va dule okungeshefa oimuna yavo moshilongo ashishe oshoyo kodje yoshilongo.
“Eshi otashi ka tulwa moilonga, kwa landulwa omulandu womukifi wekondo nelaka, omukifi wombulwa oshoyo omikifi dimwe da wedwa po tadi keelewa pomufinda utilyana,” Zaamwani ta ti.
Ovanaimuna aveshe otava indilwa opo va kufe ombinga momahongo opo va kale vena eshiivo mwaasho tashi ka tulwa moilonga.
Omunambelewa woEuropean Union Ian Dupont okwa holola kutya ekwafo eli otali holola elongewlokumwe pokati kaNamibia naEuropean Union.
“Otwa hala okukwafela okutunga oyuunda neenhele da yooloka doimuna opo ovanaimuna vokomikunda va kale vena omhito ya faafana naavo veli kombada yomufinda mutilyana opo va kufe ombinga momangeshefelo okondje yoshilongo pefimbo,”Dupont ta ti ngaho.