OUTAPI- Omusatib ǀkharisi mûǂamaob, Immanuel Shikongob ge ge mî, !hū-omkhâis ministeris ge ǂguina ǁîs ǁgūtsâdi ǀkha a sī!nâ !khaisa, !gōsase ǁgam-i !aroma a ǂhâbasa xūna sī-ūs, ǂgaoǀkhāsa !harib ai !hanaba sī-ūs tsî ǂûna aitsama !hanabasens ǂgaoǂgaodi ǀkha ǀkharib !nâ !gâi ai!gûsa dīs tsîna. 

ǀKharisi mûǂamaob ge nēsa !Nuri-oas ǀkharib ge sī!nân dis gowaǀîs hîab ǂoa ge wekheb di Wunstaxtsēs ai ge ūhâ is tawa ge mî. Sao ra ǁhûi!nâǂharidi, Anamulenges, Ruacanas, Tsandis tsî Okahao hâdi ǁga tsîb ge ǁîba ge ǂanǂan, 14 ǁgamamdi ge ǁnāpa N$4.8 miljuns ai kuruhesa. Khoese ǁgamamdi ge sores ǀgammi ǀkha hâ paigu sîsenǀgaugu ǀkha a ǂgāsa, ǁîdi ge Ruacanas, Okahaos, Tsandis tsî Onesis ǁhûi!nâǂharide !khōǂgā hâ tsî N$5.5 miljuns ai ǁkhāsiba ra ǀnōhe. 

Hāǀaro rase kha ge ǀgam ǁkhaekha N$2.2 miljuns ai ge kuruhe, ǀnanub ǁaegu !nâ ǁgam-e nî !khōǂgāse, Elims tsî Etayis ǁhûi!nâǂharira tawa. “Onamatanga ǁgamhōxū!khaib projeks tsîn ge ge dītoahe. 

Iitapa-Okeeholongo !Garo!ā ǁGammās 2ǁî !âb ge kontaraktera ge māǁnâhe. Nē projekdi ge ǁgam-e khoen tsî ûitsamaxūn !aroma mās !aroma sida !garo!ā !âgu !nâ hâ,” tib ge ge ǀaro. 

Okongos ǁGamǂgaexū!khaib tsîn ge N$40 miljuns ai ge !gâi!gâi!nâhe, ǁnāpab Calueque- Oshakati ǁgam ǂkharuba N$90 miljuns ai ge dī-ūnutsoatsoahe tsî ǁaupexa toasa !oa garu hîa. 

ǁGam paigu di !khō!khunihes Ogongos tsî Oshakatis hâra ǁaegub ge N$205 miljuns ai ge sī tsî Central North Area Water Master Plan Studysa N$35 miljuns ai. 

!Hanaǂgās ǀkhab aib ge Shikongoba a mîs ge, ǀhaob ai gu 230 hektarga Etunda !hanab !nâ aiǂhomis !nâ hâsa, hîa 2 004 tongu di mai-i N$13 miljuns ai ra ǀnōhe ǁkhāsiba ūhâ-e ra māse. 

ǀGamdisiǁkhaisaǀa ǂkhariǀnōb ai hâ ǂgarib ǂgari-aon tsî 8 ǁaeguǀnōb ai ǂgari-ais !hū!âdi tsîn ge ge māhe, ǁnā khoen hîa !hanaǂgās !nâ ra !â ǂgaon nî sîsenūse. ǁKhātib ge ǂNamipeb ǁGuiris ǂGaes tsîna gangansa ge mā, !hanaǂgāb huisenūxūna ǀkhaeb ase mās !aroma. 

Shikongob ge ge mî, 14 600 xa a !nāsa ǂgari-aon, !nāsase tarekhoedi ge marisise a ǂkhâ!nâsa !khō!oasa, ǀhaob ai N$2.7 miljunsa !hanaga !khā!khuris ǁaxasigu !aroma hîa 5252 hektarga ge !khōǂgā hâ isa. 

Okahaos !nâ mâ ǀgoaǀae!khōs kliniks hîa beros tsî sîsenaon hâ!khaiba ūhâs tsîn ge N$12.2 miljuns ai ge dītoahe. 

Universitaits Namibiab dis di Ogongo Kampes ge omaridi ǂûn ǁawosasib tsî aniǂgariba ge omkhâi. ǀHaob ain ge 4 360 ǂkhari anirona nēpa xu ge hā. 

Unams Ogongo Kampes tsîn ge !nona hektarga xu 4.5 hektargu kōse ge khoraǂuihe hîa 15 tongu di raisiba ra ǂgâxa-ūse.