Orukondwa rwa Kunene norukondwa rwa Tjozondjupa twa raisire omeritjangisiro omayandjahange meyuva etenga romeritjangisiro komatoororero omatjoziwa nga utire Omandaha.
Orukondwa rwa Kunene mu rwa tjangisire ovandu o-600 nOtjozondjupa ndwa tjangisire ovandu o-500. Omayandero wotjiveke itji omayuva womeritjangisiro omatjoziwa komatoororero nga utire Omandaha tjandje ya henunuka nomayuva yane nu kwa sewa omayuva omurongo uriri.
Kakutja nao ngunda imba mbe hi ye ritjangisa mbu mave munu kutja ngunda ku noruveze tji mave hara okukayanḓimunka mozomboṱu zouvi nozondjo tjandje omayuva ya manuka.
Ovo ve noruveze ngandu tji ye ri 19 komueze mbwi Katjose.
Komatoororero inga wOvirata vyOtukondwa nOzongomainde ngeri mu Tjikukutu ombura ndji, inga wOperesindenda nouṋepo wOmbongarero yOtjiwaṋa aya ri ombura ndja zuko wovandu mbe ritjangisa okumuna oukarata oupe womatoororero ombura ndja zuko.
Okutja omeritjangisiro omatjoziwa ku ingo wombura ndja zuko.
Ndoovazu pe na mba sere kutja ve ritjangisire posi ya mena ave ha tjiti nao kutja omena youvere poo tjarwe ave ha yenene okutjita nao.
Ondando yomatjangero womatoororero okutja kangamwa auhe ma yenene okukara morutuu roveritjangise komatoororero kutja aha rire omundu kangamwa ngu ma toorora nungwari arire imba mbe nousemba wokutoorora uriri otja tji ve urisa oviṋenge vyokutjangwa otjovatoororere komatoororero kangamwa ayehe mOnamibia.
Auhe ngu ma sokutja u nozombura o-18 nokombanda, omukwatera wa Namibia nu u nao muano mbu ma yenene okuriraisa kutja ongu ri ye kutja okauru kondjiukiro kutja oko ngo okape poo okakuru ngunda e hi yari e hi ya kutuka norutuu rokuryanga indo ruhapo.
Komatoororero wongomainde ma hepa orutuu romasutiro woviungurisiwa vyayo; omasutiro wongoze, omayazemeno womaturiro poo orutuu roruyano.
Ozondanda poo otuveze twomeritjangisiro Omandaha otji twa paturukire mOtukondwa atuhe twomatoororero mehi mu matu paturuka mohambondatu yomuhuka ngandu mohambombari yongurova ngunda omayuva ngu matu paturuka, ama ye haṋika okuza poruveze rumwe ngandu pu rwarwe.