Auleria Wakudumo
Ouministeli woikwameni neameno lokeengaba owa holola kutya owa shangifa Ovanamibia omuhoko wovayelele ve fike po16 000 okupitile moprograma yokuyandja oufemba woshilongo kovanhu vali konima meputuko, moitukulwa 11 ya hoololwa onhomenawina.
Momukanda wapitifwa komukulunhuwi liki mouministeli woikwameni Daniel Nghidinua okwa holola kutya ouministeli owa hanga elalakano lao omanga nokuli inau fika komafiku oo vali vat ula moilonga mo30 Auguste 2025.
“Otwa pondola okunyolifa ovayelele ve fike po16 153 okudja mo 31 Juli 2025. Ouministeli owali wa tengeneka okushangifa ovayelele ve fike po16 000 kexuulilo laAuguste. Eshi osha hala kutya otwa hanga nale elalakano letu omanga Auguste ina ya nomokati nokuli,” Nghidinua ta yelifa ngaho.
Ouminsteli owa holola kutya omwaalu wa hangwa otau etifa eenghono mokukwashilipaleka kutya ovanhu ovo va talikako veli konima meputuko ovena oufemba woshilongo welixwapo.
Oprograma ei oya nhuninwa okukandula po oupyakadi oo wa kala po oule wefimbo paife wovayelele unene ov veli komikunda vehena oufemba woshilongo. Ovayelele ava ova ngabekwa okulongifa oinima ihapu yepangelo molwaashi kavena omukanda woshilongo.
“Ohatu pandula ovayelele eshi va holoka molwaalu muhapu okulishangifa omaufemba avo oshilongo,” Nghidinua ta pandula.
Ouministeli owa holola olupandu kovaleli vopomufyuululwakalo eshi va dana onghandangala okulonga nokushiivifila ovayelele ouwa wokukala vena oufemba woshilongo.
Nonande ouministeli wa holola olupandu, otau indile natango ovo inaveli shangifa opo va ninge ekwatafano novanambelewa vouministeli woikwameni opo va dule okulishangifa nokumona oufemba woshilongo.
Natango otau indile ovakwashiwana unene ovaleli vopamufyuululwakalo opo va twikile okuyandja ehongo moshiwana osho sha talikako shili konima nexumo komesho unene ovo veli koushai oko kuhena omalungula ile ekwatafano lopaengodi nande nande.
Nghidinua okwa ti okukala una oufemba woshilongo kashishi ashike oufemba wakeshe umwe ashike otashi yandje yoo omhito opo omunhu a kale ta mono ouhaku wopaunamiti, ehongo nokumona omayakulo amwe okudja kepangelo.
-wakudumoauleria@gmail.com