Omupresidente omukulu Hifikepunye Pohamba okwa indile oomeme moshilongo ya hulithe po okweekelahi oohanana, nuuna Shipanga ta nyenge Nangolo ya kale teye dhi fala pomahala ga gamenwa, ngaashi piipangelo.
Pohamba okwa popi ngaaka sho anuwa a kala nokukundana oohanana tadhi ekelwahi kooyina konima yokupulumutha.
Oshiwike sha zi ko omukiintu gwomimvo 24 omulongwapangi, okwa tulwa miipandeko sho a dhipaga nokweekelahi ohanona ye yiiwike itatu, koshitopolwa shaHangwena.
“Ohanona kayina ondjo yasha, oya pumbwa okukala ya gamenwa nokutekulwa nawa, ihe haku ekelwahi. Oonkundana dhimwe ndhoka oombwiinayi,” ta popi ngaaka.
Ta ti, ombepo tayi pepe mewangandjo ombwiinayi, aantu otaya tukathana iitya iinene, notaya dhipagathana shoka kaashi li mondjila.
Pohamba okwa indile oshigwana shi lundulule shi kale shi li melandulathano ewanawa.
“Otandi indile wo ngoloneya gwoshitopolwa shOhangwena opo e ye po negumbo lyiilema osho wo aakulupe mboka itaaya vulu okwiisila oshimpwiyu yo yene,” ta indile ngaaka.
Ta ti okwa ndhindhilike kutya iilema yimwe ihayi tyapula oshikwiila haya mono okuza kepangelo uuna tayi silwa oshimpwiyu kaapambele.
Ta gwedha po kutya otashi kala oshihwepo ngele pe na mboka taya longo ongaasilishimpwiyu yawo, ngaashi hashi ningwa kuushimba.
Opolisi yaNamibia aluhe otayi kunkilile oshigwana okupitila miikundaneki shi hulithe po okweekelahi nokudhipaga oohanona, nuuna inaaye dhi hala ye dhi tule piitaasi yopolisi nenge miipangelo ngele ooyina kaye na ohole nadho.
Ya ti kehe ngoka ta ka thiga po okanona ke ita mangwa po ye ita pulwapulwa.
Martha Shinedima omuhungimwenyo gomomikunda okwa ti, omatompelo haga gandjwa koomeme taya ekelehi oohanona gamwe kage na ongushu.
“Yamwe ohaya gandja omatompelo kutya, he yohanona okwa ipatana epunda, yamwe itaya vulu okuhupitha ohanona omolwoshimaliwa kaashi po, yamwe oya tila okugeelwa momagumbo,” ta ti ngaaka.
Uupyakadhi awuhe mboka kawu vule uupyakadhi wonkalamwenyo yoye we yi tula moshiponga wu li konima yekumba osho wo to kala nondjo koshipala shaKalunga sigo aluhe.
“Otandi kumagidha oshigwana shi hulithe po okulonga iiningwanima ya tya ngaaka. Ino dhipaga,” ta kumagidha.