Omaraisiro wa Pukiro nga utire Oritjatatu nu ngu maye yanda muhuka kawovaraise wovinamuinyo na vyarwe porwe nungwari wina ouṋepo wotjiwaṋa mbwa ṋina ouṋingandu mau yenene okutaara oviṋa pekepeke.
Ndoovazu owo wa randa okarata akehe ku ke na ozondora za Namibia esere. Ovaṋingandu, omutaare omutenga ma taara ongombe ondema yOmbaramana ndja yandjwa i Rudolf Jacobs; outjavari onḓu ondume Ovan Roi okuza ku Pangii Hoveka; outjatatu onguta yovirasewa okuza ku Benii Murangi noutjaine oviungurisiwa vyomouṱuta okuza ku Martin Nambundunga. Muhuka, ndiri Oroviungura nu wina ndiri eyuva esenina romaraisiro ovaṋingandu otji mave tjivisiwa oukarata tji mau nanwa nu imbo waimbo ovaṋingandu au nanwa.
Omaraisiro nga owovinamuinyo ovinene (ozongombe) nozonyanda ngandu kovinamuinyo vyoponganda tjimuna ozombwa nozohunguriva; oviungurwa vyokomake na wina oupana. Ozonganda pekepeke ozombirivate nozohoromende maze raisa ovitjitwa vyazo na imbi mbi ze ungura tjinga omaraisiro nga ayeri owozongetjesa nOtutumbo nOvikunwa. Kangamwa ovinamuinyo mbi mavi twarewa komarasiro mavi hepa okukara nousemba wokuvinyinganyingisa. Ovanene kave nokuhepa okutira okutwaerera ovanatje tjinga ovo ava ṱuninwa oruveze pu mave nyandere.
Otweru motjitamba tjouṱuta mEpukiro na kwarwe matu undjirwa pomaraisiro nga ovitenda pu mavi undjirwa okuhwasana omireru. Omaraisiro nga maye kongorere inga wa Mongua ngari motjiveke tji tja zuko ngandu momayuva womasuviro nga kapitire. Owo pu pa ri ovinamuinyo vyonḓengu yakatjotjiri. Pu pa ri Nichlas Mbingeneeko ape ngwa kohororere orupare nokutaaara ape ozondondo azehe zozonyanda.
Otty Hembapu ngwa ka karere pomaraisiro wa Mongua wa tjangere kutja morupa rozongombo, ongombo orukoze ya Undjakuje Tjimbundu ondjari ondaare yozondaare ozonḓiṱi zozondume. Ngunda mozonḓenḓu Vija Mbingeneeko nongombo ye orukoze aa taarere ozongaze. Ozongombo zokakambe okakuru ku ka tupuka otupare otuingi motjitamba tjozonyanda, nu nai ku ke ha keyakeya ka karira okahona, Nichlas Mbingeneeko, ozonḓu zako azeembari ondume nongaze onḓa urukirwe otjozohonazozohona.