Ombuze ndja tambuka mozombuze kutja Ehi rOvandoitji kari nokusuta kangamwa otjisuta koviṱukaungura vyorukapitaveze rohuurire yohoromende yaro kai yakurirwe nawa i yozondekurona zOtjiṱiro Otjindjandja mOnamibia.

Tjiva vazo nḓu maze munu kutja ozondekurona maze sokuhanga ovita ku nehi rOvandoitji na kangamwa Omundoitji apehe pe ri ngandu ozondekuorona zOvandoitji mOnamibia. Ondekurona ndji turira mehi rOvandoitji motjihuro ohongora Omberina, Israel Kaunatjike, wa yauza kutja otjotjiri ozombuze ohunga nongurameno yEhi rOvanditji indji yokuhinokusuta otjisuta, ya ingana neye we i puratenene omuini nomatwi ye mozombuze zehi ndo. A kumwa kutja tji hapo ohoromende yehi rOvandoitji tji mai tja nao mai tja vi mouatjiri. Na tja ma undju okuzuva nawa komurungu kutja otjiṋa tji matji hee tjike. Ma tja nambano otjirwa tja sere okuhupikwa tjokukotora ehi nda vakwa.

Ombuze ndja kumisa ozondekurona ozengi oyo kambe kaparukaze tjinga ovanane vOvandoitji povikando ovingi pekekeke ava raisa kutja ehi rOvandoitji kari ripurire kotjisuta kaparukaze. 

Wina nandarire tji va, vaimba mbe tja ve kara motjihungiriro pokati kohoromende yehi ndo no ya Namibia va rora okurihatoira oveni kutja ohoromende yehi rOvandoitji ye pe kahururwa nawa kutja ndoovazu va i kuyo ohunga notjisuta, okutja kape notjihungiriro. “Omena roundu, omakuruhungi noporotika pu matu ningirire ondjesiro kOtjiṱiro Otjindjandja itji nokuzambo okuyandja omuano wondjesirasaneno nomatungururiro nga pwire,” Omaraisiro pamwe (poo onḓuvasaneno pamwe pokati ka Namibia nehi rOvandoitji yo 2021 Ojoint Declaration, ouspi OJD, i pe twa po nao. 

Nokuhina kaparukaze okuhungirira kotjisuta. Nandarire kutja ozondekoruna tjiva orupa rohoromende ya Namibia nayo oini ve kondjisa okutikura omambo ye pose ayo otjihungiriro tji tji kara po ku nehi rOvandoitji ohunga nOtjisuta. 

Omuhaamise wOkomiti yozombara zOvaherero nOvambanderu nderi mEpango ra Kandjoze ndi paha otjisuta, Mbakumua Hengari, morutuu kozombuze otjiveke tji tja zuko wa purire operesidennda ya Namibia, Netumbo Nandi-Ndeiwah kutja nai hapo epu rOtjiṱiro Otjindjandja we rirasira pi? Okuiisira kokutja okambineta ya Nangolo Mbumba, eye ngwa pingenene motjihavero mu Seninarindi ombura ndji, OJD ya yakura. Neye nganda aa ronda kotjihavero ke ya rora okutja OJD kandji ri yo kaparukaze. Hengari otji ma tja omambo we kaye ya pora Ovandoitji owo mbo ve ya poruhaera kutja kave nokusuta.