ODIBO – Omupresidente Netumbo Nandi-Ndaitwah okwa kumaida ovafitaongalo opo va kwashipaleke kutya keengeleka davo oku na eefikola dOsoondaxa nelalakano lokuyandja eetundi kounona molwashi osha fimana.
“Ovadali na nye kwashipalekeni kutya ounona ve ni otava i kofikola yOsoondaxa opo ounona ve ni va kale ve na oudeko lobimbeli,” ta ti.
Edi Omupresidente okwe di popya Olomakaya kefiku lepyapulo leedula 100 dekalepo longeleka yaAnglican moNamibia, oshoyo ekalepo leongalo loST. Marry Anglican kOdibo moshitukulwa shaHangwena.
Ongeleka yaAnglican oya totwa maNamibia momudo1924, neongalo laST. Marry olo lotete moshilongo.
Ovaleli vopapolitika veendodo da yooloka, ovabiisofi va dja meni nokondje yoshilongo, ovafitaongalo, omalelo opamifyuululwakalo oshoyo ovakwashiwana okwa li va holoka momwaalu muhapu okudimbuluka eedula 100 da wanifwa kongeleka.
Eengudu domalwiimbo okwa li da fika okuimbi nawa mwa kwatelwa ongudu lwiimbo yokoshikondo sheedolongo.
ST. Marry Anglican okwa fikola ovaleli va yooloka mwa kwatelwa Omupresidente Netumbo Nandi-Ndaitwa oshoyo Andimba Toivo ya Toivo, Ominista ikulu Charles Namolo.
Nandi-Ndaitwah okwa ti okuudite etumba eshi naye oye kwa li omunafikola kongeleka yaAnglican shaashi okwa mo nako ounongo.
“Natu fimanekeni ongeleka ei shaashi oya dana onghandangala ya kula okuyandjeneka ehongo kOvanamibia unene tuu pefimbo loita,” ta ti.
Okwa ti epangelo ota li twikile okukala lina ekwatafano liwa nongeleka ya Anglican molwashi oya longa oshilonga sha fimana.Omupresidente okwa yelifa ta ti omunafikola okwa pumbwa tete okulongwa eenghulunghedi keumbo dokufimaneka ovahongifikola.
“Ngeenge omudali ina longa okaana kaye omikalo keumbo ile e katwale kofikola yosoondaxa nena otashi eta okaana ka kale kehe na omikalo kofikola,” ta ti.Okwa ti omikalo tete ohadi tamekele keumbo osho shi li sha fimana komunafikola keshe.
Omupresidente mukulu omutivali Hifikepunye Pohamba okwa ti ongeleka yoST. Marry Anglican nai pandulwe shaashi oya longa oilonga iwa pefimbo loita okuyandjaneke ehongo kOvanamibia.
“Onda pandula aveshe ovo kwa li tava wilike endiki loST. Marry pefimbo loita shaashi Ovanamibia vahapu ova mona ouwa okupitila mongeleka omu,” ta ti.