Okuza kundino ndi ombongo yOruuano mOmurari imbwi o Ephraim Hei mOkatutura ka i na okukara noruveze mondjuwo yovayenda ovimbumba okuza mouparanga wehi tji mavi heruka okurira orupa romazemburukiro wozombura o-70 zonḓikameno yayo.
Oritjatatu ngurova ovitjitwa imbi otji vya utire kotjiveta nongumbiro nerero, ndari Oritjaine otja mombazu yongamburirio yOukriste ndi tjiukwa otjeyuva rovakazendu, tjingetjo omiramba vyombongo vya hongororere po ongumbiro. Ozongumbiro za Ritjatatu nerero yari okuserura ondjira nokukuna otjivepo komayuva womasuviro nga omazemburukiro tji maye hara otjivara notjivepo tjapeke tjinga omahi nomahi mehi ama ye wirire nokuworonganena mOtjomuise. Omazemburukiro wozombura o-70 aye ha rire omaundjwa rukwao otja tji ya undjwa nungwari ye rire ouatjiri.
Tjingetjo wina mokuundja ovimbumba okuza pendje notjihuro ongumbiro yandino mai ngara ma i hivi ozongwao ozo nḓari okuza mohambombari ngandu momuvyu wongurova, okuṱika komurongo.
Ovakambure vozombongo pekepeke, tjinene okutuurungira mehika rOnakapa za perwe okaruveze okuyeta ozombinikia zazo. Mukuka Oroviungura ovimbumba mavi tjirwa amavi handjauka momivanda vyotjihuro. Okuutira pomurari imbwi mbu rikondoroka mbu tjiukwa otjo wa Snymana okuhowa nomurari omunene wOngutukiro ngandu pu pa ri Otre, Pu ma vi rondere momatemba ngandu pozomberoo zongomainde ozonguru meṋe yOshoprite ya Katutura.
Ovimbumba avi hoo pehi rukwao mOmuvanda wOngutukiro ngandu tji mau hakayene nokururumasana na imbwi Oclemence Kapuuo. Mbu mau twara ovimbumba kombongo mOmurari oEphraim Hei. Okuza mbo ovimbumbaavi pewa okaruveze kokukamanuka nokukazara omuzaro wombongo kutja tji mai katjombokera ombari yomahatenya vi vaze pOjetu Jama opo pu mape kara omazemburukiro Oroviungura tji ye ri o-30 komueze mbwi (Katjose).
Otjitjitwa tjeyuva indi tjotjikoro ehungi reyuva ndi mari undjirwa okuyandjwa iume wokombanda mohoromende. Neyuva ari pata nongurova onene yozokowa. Kutja ependukirwa ririre rongumbiro indjo onenenene yozombura o-70.
Mo 1955 ovahungire vOtjiherero otjiva pauka kombongo yOruhindo. Tji ya ri 25 ku Katjose ombura tjingeyo Reinhardt Ruzo otja urikwa i yOmbara Otjitambi Hosea Kuṱako otjotjiuru tjombongo indji oyo ndja varwa otjombongo yotjiwaṋa.