ǂKHOANDAWES – ǂNuwiǁkhāsib tsî !Hao!nāsi ǁNaetigu ǁâudīb, ǀgūǁae ge C. Heuva Sekondere Skoli, Omaheke ǀkharib di Otjombinde ǁHûi!nâǂharis !nâ mâb tawa hâ ib, ge kai !gâi!gâba ge sī!nâse ra !khōǀkhāhe. 

Nē ǁâudīb hîa ge Kaiǀoahâ khoen ǁKhā ǁkhāsens , ǂNuwiǁkhāsib tsî !Hao!nāsi ǁNaetigu !âb, ministeris ǁgau!nâs dib xa !khōdanahe hâ ib, di dana ǁgūbas ge !ûi!gâs tsî !khōgaras !hao!nāsi ǁnaetigu disa hoa skolgu ǀkharib digu !nâsa. 

ǁKhātib ge nē ǁâudība ǁnāti ī !norasa tsî sâsa !khaiba ra ǂnuwi, !kharaga !hao!nāsi !nandi hîa !kharaga skolga ra ǂnûǁkhaebadi ǁîdi !hao!nāsi ǁaede ra ǁgauǂui, ǁnāpan skolǀgôan tsîna ǁîn ǂnuwiǁkhāsib māde ra ǁgauǂui hîa. 

Mweneni Angulas, ǁâudīb aiǂhomis komites ǁanis ge Nampasa ge mîba, skolǀgôan Tianju Happiness Hope ǂAm Skoli, Traugott Kandorozu ǂAm Skoli, Helena ǂAm Skoli tsî Donkerbos ǂAm Skoli hâgu din ge nē îxa tsî ǁkhoaxa ǁâudīb !nâ !â i !khaisa. 

“Nē ǁâudīb ge ǁnā !gâi gagas ǀhûhâsiba mâǀhaos dib, ǂnuwiǁkhāsiba ǂoaxa-ūs tsî !hao!nāsi ǂnīsasiba omkhâis tsîna ge ǂgaoǂgao!nâ,” tis ge Angulasa ge mî. 

ǁÂudīb ǁaeb !nâ di ge !kharaga !nande ge ǁhûihe Otjombinde ǁhûi!nâǂharisa nî ǂnûkhaebase, ǀkharisi ǀnûgus hîa nē kurib !nâ ǂKhoandawes !nâ nî hâse a ǀaweǁguibasas !aroma. 

!Hao!nāsi !âb ǁaxasin !nâ kha ge Traugott Kandorozu ǂAm Skoli tsî C. Heuva Sekondere Skolhâkha ǂoaǂamsa dande ge sī!nâ. 

ǀHuru!âhurus !nâ kha ge Helena ǂAm Skoli tsî C. Heuva Sekondere Skolhâkha ǁîkha māde ǁgauǂui tsî nē !âb !aroma ǀkharisi !harib ai ǀnai soasa ge ǁawoǁawo. 

Nau ǀkhāb ai, ǀnōǁnâdi tsî gongonsensa !khōǂgā hâ xūn ǂnuwiǁkhāsib ǀnûgus !nâ gu ge Tianju Happiness Hope ǂAm Skoli, Helena ǂAm Skoli tsî C. Heuva Sekondere Skolhâga ǂguro !nona !harode ge ū tsî nēs ǀkha ǁhûi!nâǂharisa ǀkharisi !harib ǀnûgus !nâ si nî ǂnûǁkhaeba. 

Angulas ra mîsa !oab ge nē ǁâudība !gâi!gâxaseb ge !gûǁnâs ǀkha ra !khōǀkhāhe. 

Skolǀgôan ge ǂnuwiǁkhāsib, ǁîǂgom!gâsens tsî sîsenǁareb ǁkhāsiga ge ǁgauǂui. Hâ ge i !nubusib marisihui!nâs dib xa !aromahe hâsen ge dans mādawa-ams hōde ge !khō!oa tama i, xaweb ge ǁâudība ǀgui!nâxasib, ǂnīsasib tsî !hao!nāsise ǀgais tsîna ge ǂoaxa-ū tsî ǁawoǁawo. 

–Nampa