TSARAXA-AIBES – ǀAeǂhuwi-i hîa ge Braunfels, ǁaupexa 10 kilometerga Khorixas !auga ǂnôas tawa a hâ i ge, ǂoa ge wekheb di Donertaxtsēs ai ǁaupexa 20 hektargu di !hū!âsa ge ǂkhôa, ǁnāpa-i ge ǂgari-ao-e ǀaesa ǂkhoana sarubēs ase khau hâ is khao!gâ.

Andrew Milesi, haiǀgoms texnise ǂansabeb, Ministeris ǂNamipeb, Haiǀgoms tsî !Narisamas (MEFT) !nâb, ge Nampasa ǂoa ge wekheb di Fraitaxtsēs ai ge mîba, nē ǀaeǂhuwib ǁkhaehe ǁoas !harib ai go sī tsî Sorri-Sorris !Aub!ûi!gâs !nâ ǀgaisa ǂoab xa go tanisīhe !khaisa. “ǀAeǂhuwib ge ǂguro !nās ase ­ǁari go tsoatsoa, ǂgari-ao-i ǁnāpa goro hâma ǂkhoana sarubēs !aroma ǀae-e khausa xu go !hui.

Nē mâsib ge ǀgaisa ǂoab xa !aromahe hâseǁkhaehe ǁoa mâsiba go !aroma. Sida ge hoa !oesa nē ǂhuwiba ǀaris !aroma nî sîsenǂkhai,” tib ge gere mî.Milesi gere mîsa !oas ge ǁkhaubas ministerisa ǁîs sîsenaona nē ǀaeǀaris ǀkha nî huise Otjiwarongosa xu ge sîǂoaxa. Khorixas di !Ā!khōmais ǀAwemā!nans ge ǀgaisase ra ǀiri ǁgam-i kai autoga ge mā tsîn ge !āǁî khoena aitsamaba xu māsen tsî ǀaeǂnauǀaris ǀkha gere hui.

Milesi ge ǁîb di ǂâiǂhansensa !gâi tama mâsib hîab !û-ai!hūba ge ǂgâ!nâb ǂnamipe gere gowaǂui. “ǂNamipeb ge !gâi tamase ge tsâǀkhāhe, ûitsamaxūn di !û-aib ge ge ǂkhôahe. Sida ge a ǀū mâǁaeb ai da ǁkhawa !gâi ǀnanuba nî !khō!oasa”. ǁÎb ge Khorixas ǁanǂgāsaben tsî !nao-am ǁgoe khoena gere ǂgan, nē ǀaeǂhuwib ǀariǂuis ǀkha mâxōǀkha nisa. !Aruǀîb ge ǁanǂgāsabena ge ǂgan, mâ !khai-i hoa-i ai ǀaesa khau tamas ka i o khau ra ǀaexoab tamas ka i o saruba aoxūsa xu ǂgōsen tsî mâpas ǀguis ka xawe-i nî ǀaeǂhuwi-i mâsiba mû, mâtikōse-i ka ǂharis tsîna, !haese nî !nurise isa. ǀAeǂhuwib ge kai ǁkhāsiba !khōǂgā hâ !hū!ân tsî !û-aiga ra hîgaga. – Nampa