Auleria Wakudumo 

Minista woikwameni neameno lokeengaba Lucia Iipumbu okwa indila oshiwana opo shi xulife po okufaneka nokuandjaneka omafano ovanhu ve na omwenyo ile vehe na omwenyo okudja moiponga yeehauto. 

Minista eshi okwe shi holola momukanda wa pitifwa Osoondaxa, sha landula oshiponga shikumwifa osho sha twaalela eemwenyo dovanhu 16 moMariental. 

“Ohandi indile oshiwana shi kale shi na omutima nokufimaneka oonakufya vetu. Oshilongo osha tuvikililwa po koshilemo shilaula nonghene inatu pumbwa okuandjaneka omafano a tya ngaha shaashi otaa halula unene ovakwanedimo vaavo ve tu fiya po,” Minista ta indile ngaho. 

Olomakaya efimbo longula okwa lopotwa oshiponga sheetuwa mbali de lidenga mumwe mondjila ya uka koMariental moshtukulwa shaHardap. 

Opolifi oya holola tai ti ovanhu 11 va xulifa ovanambelewa hava longele koshikondo sheedolongo, ovanhu vavali ovanambelewa vopolifi omanga omunhu umwe omukwashiwana a hangika naye a londekwa motuwa, omanga ovakwashiwana vavali va xulifila moshipangelo. Iipumbu okwa yelifa kutya ovo va xulifila moshipangelo vavali ova li vomovakwashiwana vaheyali ovo va li va twalwa koshipangelo. 

Umwe omunambelewa ha longele koshikondo sheedolongo omanga mukwao omunambelewa wopolifi. “Eshi osha hala kutya omwaalu woonakufya ovanambelewa ovo hava longele koshikondo sheedolongo wa ninga 12 omanga ovanambelwa vopolifi va ninga vatatu nomukwashiwana umwe oo kwa li a twaalelwa,” Iipumbu ta holola. 

Minista okwa holola yo kutya okwa didilika omafano oonakufya taa andjankwa komapandja okomalungula a yooloka. 

Iipumbu okwa yandja omahekeleko kovakwapata aveshe nookaume vovanhu avo va xulifa. 

-wakudumoauleria@gmail.com