Muzamaisi wa sipokola sanaha Namibia Joseph Shikongo uize hakuna libaka la kumbemuka, kasamulaho asinulo yakuli litobo zebalwa lisabiwa kuli lishulumukezi mwa mazoho alibangoki mwa naha South Africa. Lipiho neli tisize sabo ni lipuzo zeñata hala litaba za bulyangelino ni kamaiso mwa sipokola sa naha.
Zeo neli zibahalile patalaza kasamulaho katengo kalifasi ka ka lwanisa bubangoki neka hatisize bupaki ku akaleza kuli litobolo kuzwelela mwanaha Namibia neli wela mwa mazoho alikwata za libangoki mwanaha South Africa. Piho netisize sabo yakuli naha Namibia ikaswana yafetuha kuba nzila ya bubangoki bwa kulela mwa mbowela wa Afirika.
Hane abulela fawayalesi ya maswaniso ya NBC Labulalu, Shikongo nasepisize naha kuli hakuna kolo ya kubilaela. “Mwakweli ya Njimwana 2021, nekuna ni piho ya litobolo zene tondahala. Ze 96 neli bihilwe kuli zatondala, kono kasamulaho alipatisiso kwato fumaneha kuli neli ze 83. Taba ya bubangoki ya kwalulwa, babakulubelwa balobapeli neba tamilwe – mapokola basilezi ni limembala za sicaba ba ba beli,” nekunyatezi Shikongo.
Shikongo nalemuhile pilaelo ya sicaba kono nasepisize kuli naha Namibia isiala kuba naha ya buiketo teñi babeleki ba mulao basebeza katata kubona kuli mulao wa latelelwa. Naize mapokola banaha Namibia basweli kusebeza ni mapokola banaha South Africa kulondota taba yakufitisa litobolo isi kamulao.
Zeo halili cwalo, muzamaisi mwa sisole Philemon Shafashike, nalatuzi mabulawti akuli litobolo za sisole liwezi mwa mazoho asaswaneli. “Kakuba Sisole sa Naha Namibia, hakuna piho yelu fumani ya litobolo zetondahala. Luna mi milayo ye tiile ye zamaisa litobolo zaluna, mi hakuna piho yecwalo yelufumani,” nekubulezi Shafashike. Bazamaisi bababeli neba hatelezi kuli basweli kusebeza katata kubo kuli kuna ni buiketo ni silelezo mwanaha Namibia.