ONGWEDIVA – Opolisi moshitopolwa shaShana oyili molukongo lwaalumentu yatano mbono takutengenekwa kutya oya ponokele ositola Ongwe Mini market mOngwediva moshitopolwa shaShana, komatango gEtitano nokuya ontuku noshimaliwa N$45 344. Omupevikuluntu gopolisi moshitopolwa shaShana Frederick Djadila okwa ti aalumentu yeli yatano oya ponokele ositola  nomakatana oshowo iilwitho yilwe noku ponokela aaniilonga yeli pomashina oshowo aalandi mbono yali mo pethimbo ndyoka. Opolisi oya ti, aalumentu mboka oyali ya kutha ko omashina giimaliwa omanga yamwe yali ya pula ko oongodhi dhookasitoma.

Okasitoma yimwe oya hokolola kutya oya mono ashike ta pulwa kutya ota gandja nenge ota si.

“Ondali nda gandja ongodhi yandje yo peke, eta ndi sizimana, inandi mona we sho sha ningwa po,” ta hokolola ngaaka.

Ta ti ngele okwe mu tsakaneke ote mu dhimbulula oshoka ka kwali iisikila koshipala, ihe okwa zala ashike etsilu. Aakwashigwana mboka yali po oya popi kutya ohauto yayi naalumentu mboka oyali yathikama ko kule kashona nositola moka ya tondokele nokuya ontuku.

“Aantu mboka ka kwali taya matuka, ihe otaya endelele ashike, ngeno okwali opolisi yathika mbala ngeno oya kwatwa ashike,” omukwashigwana gumwe ta hokolola. Ta ti omukeeleli gomaliko ngoka a li po ka kwali ena ondjembo, onkene naye okwali a yi ontuku sho iilongwa tayi longwa.

Anuwa sho a pulwa okwa ti, inaya uthwa okulonga noondjembo.

Opolisi oya ka thika konima yoowili mbali. Oshitopolwa shaShana oshina iimbuluma yuuka pombanda, sho oshigwana sha ningi esiku tashi nyenyeta tashi yuugwa iniima yasho kashina omutenya nenge uusiku.

Opolisi oya indile oshigwana shi kale aluhe shina oongodhi dhopolisi adhihe opo shi kale tashi lopota pethimbo.

– vkaapanda@nepc.com.na