OSHAKATI- Oshiwike shomuthigululwakalo shoka sha dhimbulukiwa nokutyapulwa oshiwike shika osha tumbalekwa momikalo dha yooloka, okuza koosikola, kaaniilonga osho wo moshigwana oshilongo ashihe koonono.
Omuthigululwakalo ohagu dhimbulukiwa aluhe omumvo kehe, moshiwike oshititatu shaSepetemba.
Aaniilonga naanasikola yokoosikola dha yooloka oshiwike shika oya li ya zala ya opala, ye li momizalo dhopamuthigululwakalo, yamwe oya li ya teleke iikulya yomithugulwakalo nokuulikilathana esimano lyayo.
Kehe gumwe okwa zala omizalo dhomuhoko gwawo nenge ngoka a hala okuzala. Aalongwa okwa li ya zala ya opala, omanga aalongi okwa li ya kutha esiku moshiwike moka, ya zala omizalo dhopamuthigululwakalo okusimaneka oshiwike shoka.
Rosina Shoopala omunasikola posikola Oshakati Primary okwa ti, oya li ya simaneke oshiwike shomuthigululwakalo momikalo dha yooloka. “Omaandaha atuhe otwa li twa zala omizalo dha yooloka notwa li wo twa tyapula iikulya yopamuthigululwakalo nokudhana iidhano yopamuthigululwakalo,” ta ti ngaaka. Ta ti, aalongi yawo oye ya longo esimano lyomuthigululwakalo. “Onda ilonga oshindji moshiwike moka. Atuhe Aanamibia, tu na omihoko dhi na omithigululwakalo dha yooloka,” ta hokolola.
Ta popi ta ti, okwa tseya iikulya yopamuthigululwakalo yomihoko ngaashi Aakaprivi ya simaneka ohi yoZambezi Bream, Aakavango mboka ya simaneka omutete oshowo Aaherero mboka ya simaneka omaere oshowo onyama.
Ta ti, okwa tseya wo natango shoka sha pitikwa nenge sha indikwa momihoko dha yooloka, ano mbyoka ya talika ko ongiipwe nenge iidhila,” ta popi ngaaka. Shoopala okwa lombwele Kundana ta ti, oshiwike shoka oye shi tyapula nawa lela, nokwa ilonga mo oshindji.
Victor Mutota ngoka ha hiti osikola poMwadhina Gwanembenge okwa ti, oya li ya fatululilwa kutya omuthigululwakalo ogwa simana nogu na okusimanekwa sigo aluhe.
“Otwa longwa kutya omuthigululwakalo ogwa zi nale nogu na okusimanekwa sigo aluhe oshoka anuwa oshinima sha adhika ko nale, go kagu na okudhinwa,” ta hokolola.
Ta ti, oya li ya fatululilwa kutya omuthigululwakalo ogo omaukwatya gomihoko dhontumba, gwi ikwatelela kelaka, eyitaalo, omayihumbato, iikulya , omizalo , iiyimbo nosho tuu.
Mutota ta ti, okwa ilongo mo wo kutya aantu oye na okusimanekathana osho wo okutaamba uukwatya wooyakwawo.
“Oyendji oya kanitha eyitaalo lyomuthigululwakalo omolwa ya lamba shoka taya longwa kaakwiilongo nenge taya landula omikalo dhawo,” ta popi ngaaka.
-vkaapanda@nepc.com.na