OSHIKANGO – Onkalo yoongeshefa kOshikango moshitopolwa shaHangwena ya penduka ishewe sho ya li ya ningi ethimbo tayi shongola konima ondola yAamerica ya hulithwa po okulongithwa moAngola osho wo omukithi gwocorona ngoka gwa li gwa patitha oongesha dhimwe.
Aaniilonga yamwe oya li ya kanitha iilonga omanga aanangeshefa yamwe ya li ya dhipaga po oongeshefa dhawo omolwoshimaliwa shoka kwali tashi shongola.
Ngashiingeyi oongeshefa otadhi ende nawa, omapandaanda ogu udha aantu taya landitha nayamwe taya landa iinima yawo.
Ondoolopa ndjoka yi li popepi noongamba dhaAngola, ohayi mono ookasitoma odhindji okuza koAngola.
Kehe okakololo kOshikango oke na omunangeshefa ta pindike, taya hokolola nkene oongeshefa dhawo tadhi ende nawa.
Omunangeshefa gwomomapandaanda Selma Iipinge ngoka ta landitha iikutu iikulu okwa ti ongeshefa otayi ende lela nawa.
“Okuza ethimbo lyoCovid-19 onkalo oya kala ya nayipala, okwa li nda hulitha po okulanditha oshoka kakwa li ku na ookasitoma, ihe nena onda galuka,” ta popi nenyanyu.
Petrus Nambala, naye omulandithi gwomopandaanda ta landitha iiyimati okwa ti naye ote shi enditha nawa mongeshefa ye.
“Olundji iiyimati yandje yesiku ohayi pu po omanga inaandi zimbuka, omimvo dha zi ko okwa li tatu lala niiyimati, yimwe tayi ningi nayi oshoka ookasitoma okwa li tadhi shongola,” ta ti ngaaka.
Omulandithi gwokasitola kiikutu, Maria Shapua okwa ti nonando oshimaliwa okwa li tashi tondoka ethimbo lyoKwanza yi na ongushu, onkalo oya ka nayipala sho ongushu ya shuna pevi osho wo omukithi gocorona ngoka gwa li gwa ponokele oshilongo.
“Nonando onkalo yongeshefa kayi li ngaashi nale, ongushu yoshimaliwa shaNamibia otayi ende nawa, shi vulithe okuza omimvo dhoka ya li ya nayipala,” ta popi ngaaka.
Kansela gwoshikandjohogololo gwOshikango Ester Ndatala okwa ti, oongeshefa otadhi ende nawa kOshikango mokuyelekanitha nomimvo dha zi ko.
“Nonando onkalo itayi elekwa nomimvo dhotango sho kwa li kwa ikolelelwa koshimaliwa sha America moAngola, ngashingeyi oyi li nawa,” ta popi ngaaka.
Ta ti, kehe mpoka to yi ope na ongeshefa mOshikango, omayinyengo otaga gandja lela omukumo kutya oongeshefa otadhi ende nawa.
Mayola gwondoolopa yaHelao Nafidi, Darius Shaalukeni okwa ti, onkalo otayi ende yu uka kuuwanawa.
“Oongeshefa otadhi ende nawa shi vulithe omimvo dha zi ko sho kwa li onkalo ya li ya nayipala,” ta popi ngaaka.
-vkaapanda@nepc.com.na