Omukwatinghonga Gavin Gawanab okwa pewa ehandukilo leedula 57 neemwedi nhatu konima yokakuma komhangu yopombada yaWindhoek. Gawanab okwa monika ondjo mekwatonghonga loikando ihapu, ekendabalo lokukwata onghonga nokudenga oukadona nounona.
Gawanab okwa holoka komesho yomupanguli Dinnah Usiku. Usiku okwa holola kutya omhangu iyi li omhinge novakwatinghonga.
“Omhangu oya pumbwa okutuma etumwalaka lomondjila kombinga yovakwatinghonga. Nava shiive kutya otava pewa ehandukilo la hanya naau te ke shi hetekela ota ka pewa ehandukilo lopombada,” Usiku ta holola ngaho.
Gawanab otaku hokololwa vati a longela ounona vashona ominyonena fiyo osheshi ta kwatwa po mo2018. Gawanab okwa li a taalela oibofa ili 23 omo a monika ondjo moibofa aishe 14.
Oibofa oya kwatela mo ekwa tonghonga lounona vashona, a kendabala okudipaa, a denga nokweehameka, a kwata ombabyona, a teya omaumbo nelalakano lokukwata ovanhu keenghono, a ponokela ovanhu momukalo mwii, osho yo okutukana nokushundula ounhu womunhu.
Gawanab okwa tameka okulonga oushada ou, okudja mehovelo laDecemba 2012. Otaku hokololwa a kwata okaana kokakadona keedula omuwoi keenghono ndele te ka tete koilyo youkainhu.
Pefimbo loshiningwanima eshi, Gawanab okwa li a dja modolongo, a pewa elifutilemo molwoibofa ikwao i lile.
Gawanab eshi a holoka momhangu petameko, okwa shivifila omhangu kutya ke na ondjo moibofa oyo a li ta tamanekelwa.
Omupanguli Usiku okwa holola kutya eshi sha ningwa kuGawanab sha nyika oshiponga molwaashi oiningwanima ihapu okwe i ninga koshi yodungo nokulongifa ombele ile oilongifo imwe ya nyika oshiponga okuningila oonakuningwa oihakanwa omatilifo.
Okwa holola oshiningwanima osho sha ningilwa okaana keedula omuwoi “oshinima shi nyanyalifa, itashi dulu okuningilwa omunhu unene ngaho okaana.”
Pefimbo lokuulika oumbangi waye, Gawanab ina mona omhito yokuholola ngeenge oku na ondjo ile ke na ondjo osho sha fiya ohahende yaye i holole kutya ehandukilo lokuya modolongo ihali hepwa.
Nonande Gawanab okwa ninga oshiningwanima osho lwotete, okwe shi ninga momukalo mutilifa nomunyanyalifa. Eshi osha pa omhangu opo i yandje ehandukilo la pitilila olo li li momulandu wekwatonghonga osho yo wokulonga oimbuluma.
“Osha yela kutya Gawanab oku liwete e lipombada yoveta nokwa longa oikulumuna ei a manguluka ina fimaneka oveta ile a fimaneke oufemba womunhu,” omupanguli Usiku ta holola nonyati.
Usiku okwa twikila ta ti eshi oshi li oshinima itashi dulu ashike okweekelwashi ile Gawanab a kale ta ende moshiwana a manguluka ngaashi a hala.
Gawanabokwapewaehandukilo leedula 20 dekwatonghonga nokuninila okaana keedula omuwoi omunyonena wokuka teta oilyo yolutu. Gawanab okwa pewa yo eedula 15 dekwatonghonga lokaana kamwe keedula heyali needula 15 dekwatonghonga lomukadona naye e na eedula dounyasha.
Keedula okwa wedwa vali nhano dekendabalo lekwato keenghono, eemwedi nhatu eshi a dokuponokela, eedula mbali dekwato lombabyona. Gawanab okwa pewa yo ehandukilo leedula mbali eshi a denga nokuehameka oonakuningwa oihakanwa oshoyo eemwedi nhatu dokutukana nokuningila oonakuningwa oihakanwa omatilifo.
-rrouth@nepc.com.na