ONGWEDIVA – Kansela gwoshikandjohogololo Okatana moshitopolwa shaShana Edmund Ishuwa okwa hulitha Osoondaha moshipangelo shopaumwene Knickerbocker kOngwediva. 

Okwa li e na oomvula 52. 

Omukwanezimo ngoka a koleke oshiningwanima shika okwa ti Ishuwa okwa kala ta lwitha omukithi gokaankela ethimbo ele. 

Ishuwa okwa yambukile momukunda Okaku-kaNangula moshitopolwa shaShana. 

Okwa kala oshilyo shongundu yoSwapo nethimbo lye lyokulela onga kansela sho atameke omimvo ntano dha piti okwali tali thiki pehuulilo omanga omahogololo gookansela yokiitopolwa nomalelo goondoolopa inaga tameka muNovomba nuumvo. 

Omutenya gOsoondaha sho kwa li onkundana ya taambathanwa komalungula, oshigwana osha kala tashi gandja omahekelelo omolwezepo lye. 

Yamwe oya tanga Ishuwa ongomukwathi, osho wo kuume koyendji. 

Kuume ke Oscar Shikoyeni okwa dhimbulukwa Ishuwa onga omuntu gwomwenyo omwaanawa. 

“Omutekulu omukwetu okwa li omunyanyukwi nakuume kaayehe, nuuna tu li naye ohatu kala tu uvite ohole oshoka okwa li tuihole noonkondo,” ta popi ngaaka. 

Ta ti, ihashi shi shiwa esiku lyi pite po inaaya monathana naye, sha po ongele ke mo momundhingoloko. 

Ta gwedha po kutya oya kala yeli mekwatathano ewanawa lela nuuna ena uupyakandhi oheya okuwundathana naye. 

“Ishuwa okwa kala ta longo nuudhiginini okuhumitha komeho oshikandjohogololo she. 

Okwayi mbala o manga kwali ta kondjele uuwanawa woshigwana she,” ta popi ngaaka. 

Ta ti omwenyo gwe nagu vululukwe nombili. 

Omunashipundi melelo lyopashitopolwa shaShana Andreas Uutoni peha lyoshitopolwa okwa gandja omahekeleko kaakwanezimo oshowo kokuume ya nakusa. 

“Ishuwa okwa kala oshilyo shokomitiye melelo lyoshitopolwa moka a kala noku gandja omayele gongushu okuyambula po oshitopolwa shaShana. Ezepo lye ota li thigi po omwaka,” ta ti ngaaka. 

Ta gwedha po kutya esiku lyefumbiko otali ka tseyithwa komasiku gokomeho. 

Ishuwa okwa thigi ko omukulukadhi gwe naanona yaali. 

vkaapanda@nepc.com.na