Rudolf Geiseb
ǁGâuǂnamis, ǀhûǁarebese ra ǂgari-aihe !hū!âdi dis ge ǀgūǁae nî ǀkhara, hânab !hū!âdi ǂhanumā!âs hîa ge !Haosiǂnûsa a ǁgui-ai!âhesa, ǁnās hâ khami nî !khō!oahes karao. Nēs ge kai ǀkharaǀkharas hîa nî ǂgâxasa, nēsi hâ ǂhanusi ǁgaragu ǁgâuǂnamisa ra mā-am amaga.
Nēsi 18 kuriga a sîsenxa noxpa dītoasa tama !Hū!âdi ǂHânumā!âs ge !amǁares hîa !Hū-omkhâis (Aitsama a ǀhonkhoe-aihe) !Hū!âdi ǁKhawa Kō!gâsa ǂHanumās tsî ǀHûǁarebese ra ǂGari-aihe !Hū!âdi ǁKhawa Kō!gâsa ǂHanumās hâra xu hâsa, nau a ǁguisa ǂhanusi ǁgaragu ǀkha ǀhao hâse. Nē !kharaga ǂhanumā!âdi ge ǀhaoǀhaohe tsî ǀguisa ge ǂoaxa-ū, ǁnāpa di nî !gāsasiba mā, administarasis hîa nē xūn ǀkha ra !gûǁaresa ǂgaoǀkhāsa !harib ais nî hâse !gâi!gâi!nâs, tsî ǀgaiǀgais ǂhanusi !gao!gaoba, ǀguitikōsib !hū!âǀgoraǂuib !nâ nî hâs kōse. !Hū-omkhâis, ǁAun ǂharugub, ǁgam-I tsî 1Hū!âde ǁkhawa ǀgoraǂgās di ministers, Inge Zaamwanis ge ǂoa ge wekheb di Denstaxtsēs ai ǂâuǀoasasib !nâ a !amǁaresa !Hū!âdi ǂHanumā!âsa !haosiǂnûsa ge ǁgui-ai!â.
Nē ǂhanumā!âs ge ǀhûǁarebese ra ǂgari-aihe !hū!âdi nî ǁgâuǂnamihesa ra ǁkhauba, ǀnai ǁgâuǂnamisa !hū!âdi ge ministers ga mîǁgui ǁaeb khao!gâ !aruǀî hâ ǁkhā tide. Nē ǁgâuǂnamide mā-ams ose dīs di mâsib ge kai tsûadanab ase ǂhanub tsî ǂgari-aona ība. ǀNî !nae!khaidi !nân ge ǂgari-aona sorosi !khamdi kōses tsîna ǁgâuǂnamidi xa !aromahe hâse gere sī. ǂhanub di dītsâdi tsî ǀhûhâsigu ǂkhâ!nâdi ge ge !aroma nē ge !kharu kurigu !nâs mā-ams ose nî ǁgâuǂnamise isa ge ǀoroǀorohesa, ǂgaoǂgao!nâde ǀhûhâsigu ǁanina mās tsî ǁnāti mā-ams ose hā ra dīhe ǁgâuǂnamiga ūbēs !nâ-ū.
Modestus Amutseb ge New Eraba ǂoa ge wekheb di Wunstaxtsēs ai !Haosiǂnûs tawa ge mîba, ǂHanumā!âs nēs a !gâi, xawe noxopa nî !gâi!gâi!nâhese ī !âna ūhâsa. Aiǁgausen ra ǀawas !âgu !nâ ǂgari-aona ǀgui !hū!âsa ǀgam !âkha !nâ ǀgoraǂgā tsî ǀgui ǀkhāba !hanaǂgāb !aroma tsî nau ǀkhāba ûitsamaxūn !aroma sîsenūb ge tā nēsi nî ǀamǀamhe. “Tāb ge ǀkharaǀkharasa dīǀgauba ǀnain khoena ra !khō!oa !gâi!gâna hā nî ǁara. ǀNai hâ !gâi!gân ai i ge nî ǀaro tsî khoen ûiǀgauga tā !khom!nâ,” tib ge Amutseba ge mî. Zaamwanis ge ǁîs di mâi-ai!âs !nâ ge mî, !hū!âdi ǂnamipe hâ dîs supu tama hâ tsî ǀgaisase a ǁgoaǂuixa!nâ !khaisa, xawe i a ǂhâbasa !khaisa !nae!khaixa!nâ ǂhanuo!nâsigu nî gowaǀîhesa.