WINDHOEK – Minista wehongo, omaudano novanyasha Sanet Steenkamp okwa ti ovahongifikola ova fimana notava twikile okulonga nondjungu nonande va taalela omashongo a yooloka. 

Edi okwe di popya mefiku lovahongifikola olo hali dimbulukiwa momafiku 5 Kotoba omudo keshe. 

Minista okwa hala ovahongifikola aveshe omahaleloyambeko osho yo omukumo wokuhonga nelitulemo. 

Steenkamp okwa ti ovahongifikola ovanhu va pumbwa okutumbalekwa efiku keshe shaashi ohava longo oshilonga sha fimana okuyandja ounongo kounona veendodo da yooloka. 

“Otwe mu pandula ovahongifikola vetu. Twikileni nokuyandja ehongo kokaana keshe Okanamibia,” ta ti. 

Okwa ti ovahongifikola vamwe otava longo meengulu di hadi ovanafikola ashike inava teka omukumo. 

“Ovahongifkola vamwe otava longele komikunda kuhe na omeva, ku na eepate dii nomakwatafano onetiweka mai ashike otava twikile okulonga nondjungu nelalakano opo ovanafikola va pite nawa,” ta ti. 

Okwa yelifa ta ti ngeenge kape na omuhongifikola nena okaana itaka dulu okuhongwa. 

“Ohashi pula omuhongifikola opo okaana ka pite noitwa iwa kexulilo lomudo,” ta ti. 

Steenkamp okwa ti ombelewa yaye oya didilika ovahongifikola va mana okulihonga koiputudilo yopombada vehe na oilonga. 

“Epangelo ole lipyakidila okukala la kandula po omukundu ou osho yo natango omashongo oo a taalelwa keefikola,” ta ti. 

Minista okwa ti naye okwa li omuhongifikola ashike oku shi shi nghene ovahongifikola hava longo noudjuu shaashi ohava longo novanafikola va dja komaumbo a yooloka. 

-fhamalwa@nepc.com.na