Auleria Wakudumo 

Omhangulilo yaMangestalata waNdangwa oya anyena omunamido 54 e lifutile mo modolongo, omolwoshibofa shedipao lomunyasha womido 27. 

Simeon Angula ota tamanekelwa edipao lomulandi, oo vati a twa nombele eshi va li tava lu, molwoshendja yoN$2 yomulandi. 

Nakufya oye Ernesty Amutenya, omukalimo womomukunda Ondjokwe mOnankali. 

Eshi a holoka komesho yaMangestalata mEtine, Angula okwa anyenwa okulifutila modolongo, noshibofa shaye osha undulilwa komafiku 30 Maalisa 2026 opo ku nigwe omakonakono omoule. 

Angula ka li a pewa omhito yokutya sha. 

Otaku hokololwa Amutenya e ya pondingosho opo pa li tapa landifa Angula ndele ta pula ehalasha loN$8 ye ngeno a alulilwe oshendja yaye yoN$2. 

Eenhamanana oda hovela eshi Amutenya a pula oshendja yaye, nokonima eenhamanana oda ka ninga ouhandja. 

Omufekelwa okwa kufa odibo yoshitenda oyo Amutenya a pondola okukufa ko ndele te i mu dengifa vati momutwe.  Omufekelwa okwa ka kufa mo vati ombele ndele te i twifa nakuninga oshihakanwa lomedimo. 

Aveshe ova li va twalwa koshipangelo kOnandjokwe sha landula oshiningwanima oko omufekelwa a lekelwa efiku la shikula ko omanga oshihakanwa sha kala moshipangelo fiyo a xulifa momafiku 29 omwedi wa dja ko. 

Otaku hokololwa vati nakufya a li a indikwa okuenda mokandingosho kaye. 

Angula okwa li a holoka momhangu yaNdangwa Etine, noshibofa shaye osha undulilwa komafiku 30 Marsa modula tai ya. 

-wakudumoauleria@gmail.com