Auleria Wakudumo 

Omunambelewa kehangano longhalo yomhepo Odile Kgobetsi okwa ti oshivike eshi okwa teelelwa ku kale omutenya noupyu wa duva monooli. 

Okwa ti oupyu otau ka kala u na omutenya wamatutu omafiku taa teengenekwa e li avali fiyo atatu lwaapo fiyo Etitano. 

Kgobetsi okwa weda po ta ti oupyu owa teelelikwa meedoolopa ngaashi: Oshakati, Outapi nOpuwo. Eedoolopa oda tengenekwa tadi ka kala nelondo loupyu li li peedgree celsius 41. 

“Eedoolopa ngaashi: Eenhana, Okahao, Ondangwa, Khorixas, Okaukuejo noSesfontein otadi tengenekwa tadi ka kala netokopyo loupyu li li peedegree celsius 40 lwaapo,” Kgobetsi ta holola. Omunawino metengeneko longhalo yomhepo okwa holola yo kutya koushilo woshilongo nako otaku ka kala ku na oupyu. Oupyu ou owa teelelwa u ka kale u li peedegree celsius 37 ile u dule po. 

Ovakwashiwana unene vokonooli yoshilongo ova indilwa va lande omaadi okulikeelela komutenya haa ifanwa osuncreen nokukala tava vava alushe omanga inava ya momutenya unene pefimbo eli loupyu wamemememe. 

“Ohatu indile ovakwashiwana opo va nwe oikwakunguluki ngaashi omeva, va kale alushe va djala oidjalomwa ile ngeenge ve li momutenya osho yo okudjala embale. 

Nave livangeke yo okukala momutenya efimbo lile,” Kgobetsi ta indile. Kgobetsi okwa kunghilila ovanamapya novanaimuna opo va fiile oshisho oimuna noikunomwa yavo pefimbo eli. 

Ovanaimuna ova indilwa va pe oimuna yavo omeva efiku keshe omanga ovanamapya va indilwa va kale ve na ounete womudile, va tuvikila oimeno yavo. Nonande oitukulwa imwe yoshilongo tai ka kala netokopyo loupyu, imwe otai ka mona omata odula. 

Kgobetsi okwa ti konooli otaku kala oilemo mexuliloshivike oyo tai ka denga po etokopyo loupyu. Oilemo oya tengenekwa yo tai ka eta omata odula konooli mexuliloshivike. Odula oya tengenekwa tai ka tula omata pedu koushilo woshilongo, ya hovela okudja onghela. Odula ei otai tengenekwa tai ke lihanena yo koitukulwa imwe yoshilongo. 

Ovatengeneki vonghalo yomhepo ova holola kutya odula otai ka tula pedu omata a divilika pondingandinga yoshilongo okudja mEtitano fiyo omexuliloshivike. 

-wakudumoauleria@gmail.com