Gobabis-vana farama womomuknda gwaOmaheke kuna kara noudigu kuhamena veta zompe zokuhamena silinga zawo kukwama moveta zompe vana turapo. Awo kavatente asi silinga ezi zegano lyepe kuna kara asi twahepa kuzisikisamo nye unene ngwendi konomukunda doponze ndi nofarama ndahana asi dongesefa udigu unene.
Apa nye kavakahuyungire kumwe naPresidente Netumbo Nandi -Ndaitwah sivike sina puko, muhuyungilipo vana farama navenye Karin Metzger katumbwire asi egano nye eli lyokukazerura kanzambi aka ava gwana varugani wokonofarama vavazerure hena. Age katente asi kuvhura veta ezi zipire kukaza mosirugana nawa nawa. Nampili ngiomu yina kara asi veta ko zene hawe ngwa unene, ano vana faramako nye veta hawe kapi yina wapa. Eyi yokuzerura nsonso zawo hawe kunatura nye vaweki nofarama moudigu unene pasimaliwa. Nampili ngomu nye tuna lituramo asi twahepa kuzangura nondja dononzi, nokutulisapo yirugana, veta ezi kuna kara nye kuna kuturetera udigu wounene, yimo ana kutanta. Mokukwama mwendi, vanafarama vahepa kuvapulisira vatetemo yimwe, yina kara asi marara ntani nondja. Nokugwedako asi awo kuna kara nye asi kuna kugwedako kondando zokampani. Egwedereroko kunakara asi kuna kurerupika udigu wosimaliwa makura ose simpe tutare yiwizamo yetu, Metzger yimo ana kutanta. Veta nye ezi zononzambi dovarugani konofarama, ezi zatameka mwa Murongagona 2025, kuna kutanta asi nkenye murugani gahepa kugwana silinga zina siki ko N$18 movili zimwe. Wokurugana momambo vahepa kugwana N$12 movili zimwe, ano wokonondima vahepa nye kugwana N$10 movili zimwe kutameka mo 1 Murongagona 2025; N$14movili kutunda nye mwaMuriongagona 2026 ano N$18 kutunda nye mo 1Murongagona 2027.
Mokukwama nye Metzger, vadinkantu, unene owo nye vasiga sure, awo simpe vanona ntani kwato eyi vadiva, kuna kuvadigopera asi vagwane yirugana konofarama. Sinzi sovantu vangesi, katente asi kapi tavagwana nompito asi varugane morwa kapi vana kara noudivi nkenye. Ose kuna kumona asi koveli vadinkantu vetu navakakara asi kapi tavakagwana yirugana noku navayipapara kwato.
Mokuzerura zambi zawo kuvhura kuyizuvha asi egano lyewa, nye mokulitura mosirugana, makura kuna kugusako nye owo vana hepa yirugana yangoso, ‘’ yimo ana kutanta. Vana farama kavatente asi eyi yokukandwisa nsonso, awo kuna kuyimona asi kapi navavhura kuza komeho nonondima eyi vamona awo asi kuna kugava sirugana kovantu wovanzi. Age kageve nye marondoro, asi kuvhura kuzonagwisa ekuliko lyaNamibia konomukunda doponze zodorpa morwa sinzi sawo kuparuka koyirugana yina karapo nampili yokulisa nongombe. -Nampa